ЦацабехIти писа­тель­ти бикIули би­рар: «Лебтанилра ва­луси авторла бахъли бел­чIун­­си жуз бучIес хIяжатси саби, илизибад кайсидая рухI­ла давла». Ну ил секIайчи кьабулли ахIенра. Дила някъ­бази бикибси, авторличи хIер­хIеили, сегъуна-дигара жуз бу­чIули рирусра, сенахIенну лу­кIу­сини ила халаси къиян ка­бирхьуси саби. Гьанна биалли, бахъал леб жузи лу­кIу­ти ва писательти бетаэс дигути…

Ардякьунти бурхIназиб наб ХIясан Каримовли ца тамашала жус савгъатбариб. Гьалав нуни ил адам валуси ахIенри, гьанна биалли, наб иличил тянишриэс кьадарбиуб. ХIулбазивад нукьсанни виалра, илала някъбазир тамашала устадеш лер. ХIясан Каримовли массаж дирнила сихIру ункъли далули сай ва къакъла излуми (хондроз) багьладиахъес бахъал адамтас кумекбирули сай.
Дила гъай жузличила сари. «ХIебячунси мурчI», дебали тамашаласи сабигу жузлис бедибси ура. ХIясан Каримов Дахадаевла района Гьунахъарила шилизив акIубси сай. ВиштIахIейчивад хIулбазивад вайтIа чебиуси илис, гIямрулизир дахъал къияндешуни дяхIяэс чебуркъиб. БегIтани ил вайтIа чебианти дурхIнас хасбарибси интернатлизи вархьибсири. Сунела кьисмат ва гIямрула къияндешуни илис кIиркадиуб. Амма чIумаси, яхIчевси дарган урши, селизивадалра уруххIейуб ва лерил гьалабизуни гьабзадешличил дяхIяур. Илди лерил гIямрула баянти сипатдирули сай авторли сунела жузлизир.
Чечнялизир диубти дявтачилара чебетаахъили белкIи сай илини. Дунъяличиб 10 процент чулахъуни биалри, дявтани илдала лугIи кIинали имцIабиахъуб. Грозныйлизибси сукъуртала интернатлизив ХIясан левли, дехIдихьибтири дургъби. ЦархIилти дурхIни кьяйда, ил чумра дуги-хIери подваллизи дигIянвикили калунсири. Адамтала биса, кьутIкьудеш чедаиб илини.
ГIямрула кьутIкьудеш чуй­нара чIямдарес кьадар­биуб авторлис. Биалра, ур­кIи­агар­хIейубли гIямру даимдариб илини. Хъайчикайиб, духути ва пергер дурхIни абикьур. ХIясан Каримов мурталра музыка дигахъуси адам сайлин, сунела цаэсил уршилизирра музыкаличи диги адикьур илини. Дагъистанна урибси гIяртист ва Чечняла халкьла гIяртист Ринат Каримов хIевалуси Северный Кавказлизивра чилра хIергар. Гьанна дурабухъунси дудешла жуз балкьаахъес халаси къайгъибариб илини.
ХIясанна сунела аманат бихути, даргантала ва дубурлантала дурхъати гIядатуни дузахъути, бегIтала уркIи аргъибти цагьатIи урши ва рурси леб. Ил ахIену гьатIи адамла та­лихI?…
МяхIячкъалализибси М.ХIя­­­жи­ев­ла уличилси кьакьализиб чехIебиантас хасбарибси библиотека леб. Ила цалабикиб ХIясанна бахъал тяништи, гьалмагъуни ва писательти. Жуз­личила пикруми дурули илала бархкьяби гъайбухъун.
Дила пикрили ил жузла презентация школабазиб ва колледжуназибра дураберкIес ва бучIанти иличил тянишбарес хIяжатси саби. СенахIенну гIямрула шуртIри гьарил шайчирад чедетаахъили сипатдарили сари авторли ил жузлизир. БелчIес гьамадси ва тамашаласили уббухъун ил жуз.
Балбуцла ахирличив, лебилра бутIакьянчибас баркалла балахъули, ХIясан Каримовра гъайухъун. Жагьти дурхIначи ил дугьавизур «Дургъби чедаибсини бала илдани бируси палакатдешличила ва зарултачила. Чисалра диргалахIедулхъути нуша чулахъуначи цIа чекьуртири итхIели ва бахъал дурхIни кабушибтири. Гьаннара ну илди гьанбикунани азадвалтули ахIенра. Чечняла дявила хатIаби цархIилтасра гIибратли диубли, дунъя паргъатли кали дигулра», — викIи ил.
Ахирличир Ринат Каримовли, сунела пергер тIамали, далуйти делчIун ва адамтала уркIби шаддиахъуб.
Ишаб ХIясаннис хасбарибси назмура гьалабирхьулра.

ХIясан
Каримовлис
Иш палакатси дунъя
Чедибяхъири чуйна,
Адамдешра хIяяра
ХIердарири мургьиван.

УрхIлагъунти ахIенри
ДурхIядешла дусмира,
ГIямрула кьяркьси гьунчив
Виубри вашес вархьли.

БалкIли башантасра хIу
НасихIятчири гIяхIси
ЧехIедиантачивра,
ГIямру чедиан сайри.

Пикруми ва баркьуди
ХIела умутихIели,
Иш дунъяличиб хIуни
Гьалжана баргилири.

ХIялал яшав лушули
Адамти булгахъулри,
ХIела мургьила някъба
Чум адам берцахъилри.

Урехи , кIибяхIяндеш
Агарли хIерирулри,
Кахти излумазибад
Адамти уцахъулри.

ХIулбала шала кIелцад
ГIякьлу гиб хIед Аллагьли,
ХIела рухIла давлара
Дарман саби зягIиптас.

АхIенри хIу акIубла
Мас-давлаличи гъаргъси,
Гъабзари хIу даргала,
Гьалмагъунасра марси.

Бамсаллира иш дунъя
Дуги-хIери ласбикIес,
Мадамсаб хIела някъби,
Излуми сагъдирахъес.

ХIербиаб хIела кьамра
Бихули хIела амру,
Багьадур, дарган яхIла,
Леб хIечиб дила пахру.