ИшбархӀи гьарли-марли набчил бетаурси анцIбукьличила бурес дигулра. Дила пикрили, илдигъунтачила ва адамтала уркӀи гьаргти хIяланачила чараагарли бурес чебиркур.
2021 ибил дус, июльла 4. Ил бархӀи ну дила тухумтачил машиналичив шилизи аркьулри. Селра вайси агарсири: буцӀарси бархӀи, хъули гьалакти нуша.
Уркарахъ гIелаб батурли, КӀишала шилизи диухӀели, хапли машина балуй шайчи гьакӀбухъун, гьунчибад 2-3 метрличи шалигьабли кабизур. Нуша урухдиэсра бажардихIедикира, сенахӀенну ил вайси анцIбукь хапли кабикиб. Машинализивад дураухъи, хӀерикӀулра – хӀула баргбердили уббухъун. Се бируси гьанна? ГӀурхӀейс пайдалабаресли, кабихьибси хӀула агара, шагьарлизиб ил дурасибсири, цархӀилти ваяхӀ кадихьес багьандан. Агь, хатӀабарира ил батурли!
Мякьлав цалра адам агара, кумек агара. Нуша, дамсурли, гушли, кумек бакӀайчи тӀашли илар чумал сягӀят калес асубири. Амма се бетаура? КӀел-хӀябал минут дикили гIергъи, се баралли гӀяхӀсира или, пикридикӀули лерай, гумила шайчиб машина багьарбиуб ва мякьлаб тӀашбизур. Илаб кӀел мурул адам лебри. БусягӀятал дурабухъи, дахъал суалти агарли кумекбарес къалабабикиб. Жагьил, набчил варх, сунела машиналичив хӀула асес гьарахъли ахIенси тукейзи вакIиб. Халаветаибси мурул адам биалли, дила тухумти паргъатбирули, масхурта угьули, бехӀемцӀ бетаурси мерлав калун.
ВецӀал минут дикибхӀели, хӀулаличил чардухъунра. Камси заманала гIергъи, сагаси хӀулаличилси машина гьуни даимбарес хӀядурлири. ХӀера, анцӀбукь кабикибси манзилличирад байхъала сягӀятра хӀедикиб, лерилра аги-кьяйда гIягIниси тяхIярличи дикахъира.
Буралли, илди, нушачи пикри бяхӀчихӀеили, чула замана харжхIебарили, шулумбухъесра бири. Илкьяйда нуша сецадхӀи кавлутирил, ца Аллагьли бала. Нушачи бакIибси балагь чебаили, илди хъярхъли кумекличи музабухъун. ГIяхIдеш барес гьалакти «Дахадаевла районна» МО-ла администрацияла «Граждантала оборонала, гьанагарти анцIбукьунала ва ЕДДС-ла (диспетчертала цаси дежурный кумекла)» МКУ-лис бекӀдеш дируси Ибрагьимов Рабазан ГӀябдуллаевич ва илала уртахъ СягӀидов Руслан Асадуллаевич сабри. Илдас халаси баркалла багьахъес дигулра. Гьарли-марли, чула хӀянчи балути, чис-дигара кумекбарес гьалакти, кагъуртази ахъили, адамтачи челукьутачила хъумхӀертурли, илдас гьарил баркьудилизиб пайдалабиэс къайгъилизибти адамти саби илди. БегӀла гьалабси яргализиб, илдигъунти санигӀятуни дузахъути адамтас сари алапаби ахъдурцес хIяжатси. Ну къияйзи викибхӀели, цалра футболистли яра далайчили кумекхӀебарибгу. Чедиб гьанбушибтала биалли, гьарли-марли, халкьлис хIяжатти ва мягIничерти санигIятуни сари. Адамтас кумекбарес дигути, чус селра барсур тIалабхIебирути – илдигъунти саби нушала адамти!
«Хъули детаибхӀели, нешлизи саламти дура ва набчи зянкъдяхъя, хӀуша ара-сагъли гIягIниси мерличи даъниличила багьахъес багьандан», – буриб Рабазан ГӀябдуллаевичли, ва чула гьуни даимбариб. ГӀур зянкъдяхъибхӀели, нуни багьурра илдас гьунчиб нушачилгъуна анцӀбукь кабикибти кӀел дейбукӀан цугбикниличила. Илдасра дубурлан гъубзнани кумекбарилри.
Илкьяйда, Дахадаевла районна гьундурачиб хӀушачил вайси анцӀбукь бетарар или урухмакӀудая, итмаданал кумекличи музабулхъан Рабазан ГӀябдуллаевич яра илала хӀянчизарти.
Эгер бехIемцI бетаурсилис кумек хIяжатбикалли, ишаб Рабазан ГӀябдуллаевичла телефонна номер гьалабирхьулра: +7 964 013-90-50.
