Ишдусла майла 19-ли­чиб Дагъистан Рес­публикала Р.ХIям­­­­затовла уличилси Мил­лат­­ла библиотекала конфе­ренц-заллизиб Дагъис­танна халкьла поэт Аминат ГIяб­дул­ма­­­­напова 75 дус риъниличил барх­­­басахъи, шадлихъ дура­бер­­кIиб.

Даргала машгьурси поэт­ла творчество дигантани ва Ами­натла халаси хIурматбирути адамтани зал гарчли би­­цIилри. Ила цалабикилри че­­бяхIси даражала заведениебала преподавательти, сту­­­дентуни, педагогуни, бу­чIан­­ти, журна­листуни, поэ­туни, пи­сательти, далайчиби, му­зы­кан­туни­, жа­мигIятла хIя­ра­кат­чиби.
Аминат ГIябдулманапова пагьмучерси ва машгьурси поэт риънилис бикьридеш дирули сари илала 60-йчирра имцIали жуз дурадухънилира школала программализи, Дагъистанна ва Северный Кавказла антологиялизи илала творчество каберхахънилира.
Аминат ГIябдулманаповани бегI гьалар сунела гIямру пе­дагогла санигIятличил дарх­дасахъе­с кьасбарибси­ри ва ДГПУ-ла фи­зи­кала-ма­те­ма­ти­ка­ла факультетлизи карерхурсири. Школализир математикала мугIяллимли рузескарииб. Амма дубурлан рурсилизир шурмазирадли шарабван творчестволашалси пагьмула урун­жунира гьардикIескадииб. Ил­ди цадехIалра тIашаэс дирутира ахIен. Илкьяйдали Аминатли хIи­­сабла дурсри литература­лай­чи шурдалтескарииб. ДурхI­нас­ра дигулри шягIирла умутчебси поэзияла «гажиннизибадли» «дарма шинни» бужес. Илкьяйдали Аминатла икьайчил илала ученику­назибадли поэтуни бетауртира ахъиб.
Аминатли сунела пагьмула хIячми мурхьдарес кьасбариб ва Москвализибси М.Горькийла ули­чилси Литературный инс­титутлизи гьуни буциб. Илаб ит­хIе­ли улкала чеббикIибти преподавательтани дубурлан рурсилис гIямрула ва творчествола кагибти дурсри кадирх­ьутири. Иличил барх бучIутири СССР-лизирти узити рес­публикабала вакилтира. Илдачил Аминатли гьаннара гьа­л­магъдешла бархбасуни къя­баили ахIен. Дахадаевла районна Хъярбукла шилизирадси рурсила назмурти урусла ва цархIилти мезаначил дурадулхъескадииб.
КIарахъала машгьурси шя­гIир КьахIаб Росолан Мя­хI­муд­личи урши алхунси дубурлан хьунул адам дугьаризурли са­ри чIиллай белкIахъес. Чума­л бархIи пикривикIули кали сай поэт, амма белкI бетарули ахIен. Хьунул адам кIинайс ра­кIиб­хIели илини бурили сай ну беб­­кIибтачила лукIан ахIенра, нуни дигайличила, челябкьла­ли­чила, талихI­ли­чила сари наз­мурти ца­ладирхъути или. Нушала Ами­натлира дар­га­лацунра ахIи, Дагъистанна цар­хIил­ти миллатунала далайчибасра далуйти лукIуси сари. Илди сари марти дигайличила, та­лихIличила, умут­чебси челябкьлаличила. Гьан­на илди 500-личи адикили сари. Ил халаси сархибдеш са­би, се­на­хIенну гьарил далайчис сунела уркIила хIялани ва кьисмат пикрилизи касили, илини гьалабихьибси макьамличи далдикахъили далуйти делкIес хIя­жат­си саби.
Илгъуна хIянчи барес вирар чIянкIли далайла ва назмурти лукIнила пагьмурти лерси, цархIилла уркIила хIялани ункъли иргъуси адамлицун. Аминат ил багьандан сари далайчибани ва илдачи лехIирхъутани халаси хIур­мат­личил алавруцибси.
Халати жавабкардеш хъар­­дикили сари ишбархIи А.ГIяб­дулманаповачи дарган мезли дурабулхъуси «Лачин» журналла редактор сарлинра. КIел базли гьачам дурабулхъуси даргала миллатла биштIатас хасбарибси ил журнал Аминатли суненицун балкьарахъуси саби ва ила сунела ва цархIилти автортала макьалаби, назмурти ва биштIатала суратуни кадурхахъути сари. Ил илцадра чебетаахъили хIя­дур­бируси саби, хIятта школабазиб нешла мезла дурсрачибра пайдалабирес лайикьси саби. Ил кайсантани ункъли балули саби сегъунти пайдалати гIякьлумани, насихIятунани ва мисалтани бухIнабицIилил журнал. Чула дурхIначи диги лерти ва нешла мез хъум­хIер­тахъес къайгъилизибти бегI­тани ва чула санигIят ункъли балути мугIяллимтани ил кайсесра хIяжатси саби.
Юбилейлис хасбарибси шад­лихъ бузахъулри Дагъистанна писательтала Союзла дарга­ла секцияла руководитель, ДГУ-ла профессор, филологияла гIил­муртала доктор Муса Бя­хIям­ма­довли.
Микрофонна гьала дурабухъи, поэтлис къугъати гъай дуриб «Тарихла-культурала рухIла кабиз» ибси жамигIятла ор­ганизацияла руководитель Перзият БяхIяндовани, ДР-ла Дагъистанна писательтала Союзла Правлениела председательла заместитель, Дагъистанна халкьла поэт Марина ГIяхIмадова-Колюбякинани (илини Россияла писательтала Союзла шайзибад «ХIур­матла грамота» ва Нобельла премияла лауреат И.Бу­нинна премияла сертифи­кат дедиб), Р.ХIямзатовла ули­­чилси миллатла библиоте­кала директорла заместитель Са­рат ЖабрагIиловани, «Дагестанская жизнь» газетала хIянчизар ХIяжи Мирзоевли, ДР-ла урибси юрист ГIялихIяжи МяхIяммадрасуловли ва бахъал цархIилтира.
Гъайбухъунтани А.ГIябдул­ма­­наповас ХIурматла Грамотаби, Баркаллала кагъурти ва ме­дальти дедиб. Илкьяйдали Ами­натла михъири дургъбазивад чедибдеш сархили чарулхъуси ургъаннаван ордентани парх­­бикIахъулри. Илра бузерила чедибдешлис бедибси ахъ­си кьимат биъни аргъеслири.
Балбуцличир гьайбатти далуйти зайдухъахъун Дагъистан Республикала ва Чечняла Рес­публикала халкьла гIяртистка ПатIимат Кьагьировани, ДР-ла халкьла гIяртистуни Пирдауз Камаловани, ЦIибац ГIяли­ши­­­ховани, Сулайбан ГIяб­дул­лаев­ли ва бахъал цар­хIил­та­нира.
Дубуртар Улкала тах шагьарла дахъалгъунти школабала бучIантани поэтла назмурти делчIун.
Библиотекала краеведческий ва миллатла литературала отделла бекI библиотекарь Салимат ХIяжиевани жагали балкьаахъурси А.ГIябдул­ма­на­повала «Иш дунъяличирадли ну даимлис архIякьяс» ибси жузала выставкара лебтасалра гIяхIбизур.
Гьаларван ну А.ГIябдул­ма­на­повала хъули рякьунхIели, тамашахIериэс хIериубра балбуцличир дедибти шабагъатуни чедаибхIели. Илдачила цархIил белкIлизиб гьанбушес кьасбирис. Иш гьакIлис Аминатла гIямрулизир дунъяличир лерти бегIлара гIяхIтигъунтицун анцIбукьуни кадиркаб эс саби калунси. Дерхъаб хIела къугъати гIямру, дила кьаламла рузи Аминат!
…Адамтани халаси хIур­мат­­бируси ва сунела бугаси пагьмули ахъруцибси Аминат ГIябдулманаповала юбилейличил бархбасахъи, илис шабагъатуни лу­гути бархIиличи-бархIи имцIабикIули саби. ХIе­ра, гьаларванра урусла че­вяхIси поэт ва писатель, Нобельла премияла лауреат И.Бу­нинна уличилси «Урусла ли­тературалис мардеш дирни багьандан» ибси ли­те­ра­ту­рала-жамигIятла премияра «И.Бунин» ибси медальра дедиб.