Ну акIубси Сагаси Мугрила шилизиб машгьурти ва шила багьа ахъбуцибти бахъал гIяхIгъубзни лебти саби. Илдала лугIилизивадси сай МуртузагIялиев Дауд МуртузагIялиевичра. Ил шилизиб верхIел классла багьуди касили гIергъи, Сергокъалала педучилищелизи учIес керхур.
Илавра ил отличноли учIусири. Бузерила цаибти гунзри кацIиб илини Мугрила школализив урус мезла ва литературала, дарган мезла ва литературала дурсри кадирхьули. МугIяллимли узули дусцадхIи кали гIергъи, ил гIярмияла къяяназиб къуллукъбарахъес живарибсири. Илини Архангельсклизиб ВатIайс ламусличил къуллукъбарибсири. ЧарухъунхIели ДГУ-ла филологияла факультетла урусла-Дагъистанна мезанала отделениелизи керхурсири. Ункъли учIес бажардииркусири илавра дубурлан урши.
БелчIуди хъараахъурхIели, Дауд МуртузагIялиевич Губданила школализив узахъес вархьибсири. Иларра илини урус мезла ва литературала, дарган мезла ва литературала дурсри кадирхьутири. 10 дус губдалантала дурхIнас мурхьти багьудлуми лугули ва илди гIибратчебси бяркъличи биркахъули, сабухъчевли узусири ил.
Партияла Сергокъалала райкомлизи живарибсири ил ва Мугрила шила советла председательли узахъес маслигIятбарибсири. Илкьяйдали илини сунечи бихьибси игьдибар марбирули, 30 дус гIибратчебси хIянчи барибсири. КIинайс пенсияличи арякьунхIели ил къуллукъличивад арякьунсири. Амма ил паргъатли уэс вируси ахIенри ва гIурра сай акIубси шила школализив мугIяллимли узескайибсири. Узиб ил завучлира.
Мугран гIяхIгъабзала сабухъчебси бузери ахъли кьиматлабариб улкали. Илис дахъал шабагъатуни дедибтири. Амма адамтала баркалла ва хIурмат илис дедибти бегIлара ахъти шабагъатунири.
Чумал дус гьалав ил декIли зягIипикиб ва итил дунъяличи арякьун. Илгъуна бахълис гIяхIдешуни дарибси, ва гIямрулизир бархьдешра хIялалдешра байрахъли детаахъурли, хIериубси адамличила шантани хъумуртули ахIен. Илала гIяхIбаркьуначила лебтанилра даим гьанбуршули бирар. БикIули бираргу, адам убкIуси ахIен иличила халкьли гьанбиркахъули лебай или. ХIебиалли, Дауд МуртузагIялиевичра мицIирли сай, ва адамтала уркIбази савлила шалда зубариван минакайубли сай.
