«Коронавирусла чейхъуси изайчила хабурти иргъухIели нунира, цархIилтаниван, гьала-гьала халаси-декIар пикри бяхIчихIеира. Наб гьанбикибсири, илди сегъуналра хьулчи агарти, дацI гъай дургар или. Нушала улкализибра ил изайзи бикибти бахъбикIухIели, паргъатагарриубра. Замана арбашуцад, зягIипти имцIабикIесбииб. БубкIутира бахъбикIулри.
Пикрирухъунра ну: белики, гIягIнили бургар вакцина барахъес или. Амма иличи къаршитира лебри, дила тухумтала ва нуни балутала ургаб бархли. Илдани вакциналичила гьарли-марли урухиэсти хабурти дурулри: вакцина кьанни дакIубарибси дарман саби ва ил барахъибси адамличил се бетарусил гьанналис чилилра белгибарили ахIен или. ГIяхIцадхIи калунра ну ил хIяйчир.
Рамсурра ну даим урухкIес, балутачи гIяхIладли хIерашес. ЗягIипбикахъишара рикIули, дила мякьлаб хIербирути бегIтачи рархли хIерашули калунра.
«СецадхIи уэс вирусив адам ил хIяйчив?» — ахирра-ахир пикрирухъунра ва поликлиникализи вакцина барахъес халаси кьасличил раира.
Медсестрали бицIахъиб бухъяна анкета, умцур кьаркьа температура, тухтур-терапевтли хIясиббариб хIила гъяж. ГIур хьарбаиб дила излумачила, баянбариб, къарширикирал ну гIергъиси замана ковидлизи бикибти адамтачил ва рархьира укол барахъес.
Гьамадси секIал буилригу ил. Кункси някъла регI рииши медсестра, ну укол барниличи шакра хIерикира. ГIур камси замана укол барибси мер изули калун. Я ил бархIи, я гIергъила бархIи дила температура ахъхIебиуб. КIиибил укол бируси саби бикIули набзи телефоннизибад багьахъур. ХIерила замана рякьи, илра барахъира.
— Барахъирив вакцина? СекIал изесбиибу?– хьарбаиб набзи халаветаибси дудешли.
— Барахъира. Укол барниличи шакхIерикира, — рикIулра ну.
— ХIебиалли нунира бирахъис, — викIар ил. – Гьаланачиб хIила анализ барахъили.
Ахирличиб нуни буруси иш саби: 60 процентла республикализиб хIербирути адамтани чараагарли вакцина барахъес гIягIниси саби, бикIар, нушачиб коллективный иммунитет биахъес багьандан. ХIебиалли, ахIерти газета бучIанти, вакциналигIир уруххIекIули, поликлиникабази гьайбарая.