Муртрил дубурла къа­да шараб-шин­ни гарчли бицIа­хъили, вях-или кабу­хъунси варачан кIантIалра шинна агарли, бегъубли чебаиб­хIели, наб бацI­кабухъунси Запир Хар­биловла кабинет гьан­бикиб. Илра тяп дубурла вара­чанван гIямрули парч­бикIусири, бузерила макьам­тауб чугурла гиван зай­бикIусири, шинни иркути ав­лахъуниван халкьла игит­деш­ли­чила, гъабза­деш­личила, яшав­­ли­чила, гьарбизуначила, гIяхI­баркьу­начила, … макьала­бачил дав­лачебсири…

ИшбархIи «Замана» газетала редакция­ла хIянчизарти ил кабинетлизи чула макьалаби ахтардидарахъес, маслигIятла дев бурахъес, хIебалусиличила хьарбаэс, чус дарсли детарути макьалаби делчIес, … абицIули ахIен… Илав дахъал дусмазив узули калунси Дагъистанна машгьурти жур­налистунала цаибтала къяяназивадси, даргала миллат сунела даргла узби-рузбиван дигахъуси ва илдала багьа-кьимат ахъдиахъес дахъал дусмазив узули калунси Дахадаевла районна Кьункьила шилизивадси гIяхIгъабза Запир Харбилов агархIели…
Ил нушачивад итил дунъяличи арякьунхIейчирадли ишди бурхIназир дус дикили сари. Амма ил гьанна нуша-ургав агниличи сеннира дирхес гьамадли ахIен. СенахIенну ил дунъя каберхурли ахир кабизалра мицIирли калесил, даимлис даргантала хъарихъли, бархьдеш-мардешла байрахъ лерилра гIямрулизиб ахъли бихуси дубурлан сайри.
Дургъбазивад дудеш чархIевхъи, ятимдешличи вяхIягили виалра, илала неш Ди­вини урши къугъали айкьур, багьуди каса­хъиб, гIямрула бархьси дякьличи дураиб. Диви, бикIуливан, даршал гIяхIгъабзази ру­хъесил хьунул адамри. Гьанна Запирла рурсили илала у бихули сари. Илди­гъун­ти бегIтала бирар Запиргъунти дурхI­ни алкIутира. Бахълис багалабирути, цар­хIил­тала вайра гIяхIра чулаван кьабулдирути, чеалкIуси наслулис гIибратли биэсти, …
Дус гьалав хабарагарли нушазивад кьисматли кевасиб нушала редакцияла хъарихъли ветаурси, бахъхIи бузули калунти хIянчизартас къакъбяхъли вируси ва жагьилти журналистунас челябкьлализи гьуни гьаргбируси, савлила шалдали вируси, хабарла дарган З.Харбилов. Дахъал дусмазиб даргала журналистика кьяшмачи тIашбалтули, ил гьалабяхI башахъули, чекабизурли бузути машгьурти журналистуни цацали арбашухIели, хIябилра бацIбухъи леб нушала редакция. Чуйнара гьаниркули сай нушала гьар шайчивад дагьрили, шарабли урунжван, гарчли вицIибси Запир МяхIяммадович. Ил левхIели нушаб сегъунтилра энциклопедияби, словарьти, грамматикаби хIяжатти ахIенри, илини сегъуна-дигара суайс итмадан халаси иштяхIличил жаваб чарбалтусири, даимлис багалабиэсли, бекIлил хъумхIертесли, бузерилизиб пайдалабиэсли, гIямру шаладиахъесли, …
Бахъал адамтас багалавиубси, бахълис гIяхIдешуни дарибси, ЧевяхIси малаикливан хIялай гIямру деркIибси, даргантас бархьдешла лами абалкахъунси, дубурлантала гIямру вавалидяхъяхъес багьандан, лерилра сунела дагьрира цIакьанира харждарибси пергер адам Аллагьлира гьалжанализи хьуравирниличи дирхехIе.
Сай даимлис арякьи виалра, илини лебгIеб къугъаси ва дудешла гIяхIти баркьудлуми даимдируси кулпет (2 урши ва 2 рурси) гIелаб батур. Илданира чула дудешливан гьаннала гIергъи дарганти разибирниличи дирхехIе.