Индийский штамм бикIуси изала Россиялизибра тIинтIбикIесбииб. Илизи бикибтала лугIи 70 процентличи абиркули саби – илдигъунти баянти гьаладихьиб GISAID платформали, суненира чейхъути излумачила багьахъниби цаладирхъуси.
Иличил барх, Роспотребнадзорла бекI Анна Поповани июньна бехIбихьудличибал бурибсири, COVID-19 иза бегIлара машгьурси жура саби – британская или. Илкьяйда, илини индийский штамм жигарчебли тIинтIбикIниличилара марбариб.
Гьанна индийский штамм, бегIлара камли, 62 улкализиб, ил лугIилизиб – Россиялизибра, тIинтIбиубли саби. Илини цархIилти журабира ца шайчир датурли, гьалабяхI башули сби. Вайси изайчил зягIипбикибтала лугIи Россиялизиб июньничибад имцIабикIесбииб.
Селичибли урехиласи?
Коронавирусла индийский жура, яра илис гьанна дельта-штамм бикIули саби, лебниличила белгибиубсири байхъала дусличибра имцIаси заманалис гьалабал. Гьаланачи ил Индиялизиб гьар бархIи зягIипбиркутачил ва бебкIибтала жаназаби игути цIала ламиличил бархбалсахъусири. КIинайс дельта-штаммличил дяхIягиб западла улкнира, гьанна — Россияра.
ЖумягIла бухIнаб изайзи бикибтала кьадар хъярхъли халабаиб. Больницабала гьалар «къалабаси кумекла» машинабала пробкаби детаур. Чейхъути излумала шайчибти тухтурти пандемияла хIябъибил гьуцIличила гъайбикIесбииб. Лерилра аги-кьяйдалис сабабли детаур индийский штаммла хасдешуни или бурули саби чейхъути излумала шайчивси тухтур Е.Тимаковли: «Ил кьаркьайзи бикили гIергъи, нушала иммунитетла кабизуназибад дигIянбиркули ва хъярхъли тIинтIбикIулира саби. Гьанна зумали зягIипбиркесбииб жагьилти ва дурхIни. Дила пикрили, индийский штамм хаслира халати шагьуртикад къунзбулхъан».
Иличи че, ил изай дебали декIти асуртира детарахъули сари. ЗягIипбикибтала тромбани алкIули сари, иларад биалли инсультуни, хургьрала тумала тромбоэмболияби детарули сари, бекIла мехIела башрира вайбирахъули. ИлхIелира больницабази имцIаливан жагьилти кабиркьули саби.
Лишанти.
ИшбархIи ил иза лишантала черкадти баянти декIар-декIарти сари. ЦацадехIти улкназир аги-кьяйда дарсдиъни хIисаббирули саби, цархIилтазиб – ахIен.
Бахъал зягIипти алхунси Индиялизир тухтуртани ишдигъунти лишанти белгидариб:
— вайтIа бикьни;
— дарг-махла бузери вайбиъни;
— микротромбани акIни, шаха дикни;
— кьаркьа биркIанти изесдяхIни;
— хъяб бемдни, декIси тонзиллит (миндалинаби тяхIудяхъни).
ГIядатласи коронавирусла иза лишанти – хаслира хъехI ва тIем-гягI хIедални – гьанна камли къаршидиркули сари.
Экспертунала гъай хIясибли, урехи адамтани ил изала тяхIувяхънила изайзи халбарили, хъули кахIебирънилизиб саби. Илкьяйдали индийский штамм хъярхъли тIинтIбикIес даимбирар.
Вакцинали мяхIкамвирув?
Вакцина дураибтани ва тухтуртани буриливан, бусягIятла замана индийский штаммлис къаршидеш дирнила бегIлара асарчебси тяхIяр саби вакцина барахъни.
Илкьяйда ибси се ибси: эгер хIушани прививка барахъили ва халати антителаби касили диадалли, хIуша коронавирусла чейхъуси изайзи хIедиркудая ибси ахIен, амма илала декIти асуртазибад мяхIкамдеш гIеббурцидая, реанимациялизи хIедиркудая, баянбирули саби Россияла урибси тухтур Михаил Каганни.
ЗягIипбикили, арабиубтас прививка барес хIяжатдеш лебу?
ГIе. ЗягIипдеш ардякьи гIергъи, гьаланачи антителаби лерниличи вирхес вирар, амма замана бикибхIели, вакцина барахъес хIяжатдеш алкIан. Сецад замана бикили гIергъи, прививка бирахъусил – якьинни бурес къиянни саби, амма, урехи хIебиахъес багьандан, зягIипвикили, хIябал-авал баз дикили гIергъи, ил барахъес вирар, байхъала дус дикили гIергъи – чараагарли хIяжатси саби. Иличи че, декабрь-январьличиб прививка барахъибтас гьанна сагадан ил барахъес гIягIнили биъниличила пикрибикIес замана баили саби.
Дагъистаннизибра тIинтIбикIули.
Республикализиб гIергъити дуги-хIерилизиб хургьрала изайзи бикибти ва коронавирусла чейхъуси изала лебнила васвасъала алкIахъути 468 адам больницализи кабаркьили саби – ил 2021 ибил дусла бехIбихьудличибад хIисаббаралли, дебали халаси кьадар саби. ДР-ла шайчивси Роспотребнадзорла руководитель Николай Павловла гъай хIясибли, Дагъистаннизир чейхъуси иза индийский штаммла 9 анцIбукь белгидиубли сари, сунелара изала белгихIебируси замана 3-личибад 5-личи бикайчи бархIилис хасбируси.
ДР-ла арадеш бихIнила Министерстволи республикала халкь арадешличи чекабизахъес ва, ОРВИ-ла лишанти лерхIели, медицинала учреждениебази хIебашахъес, хъули специалистуни жибирахъес маслигIятбирули саби. Иличи че, коронавирусла чейхъуси изайчи къаршили прививка хIебарахъибтази гъамси заманализиб ил барахъес бурули саби, регионнизиб вакцина лебай ва ил нушачи биахъес даимбиъни багьандан.
ДР-ла арадеш бихIнила министр Татьяна Беляевани илдигъунти шуртIразиб дяхIликалаби агарли, бузес, бамсриихъути мераначи башес ва цархIилти баркьудлуми дурадеркIес дебали урехиласи саби или цIакьбарили буриб.
«Нушани дяхIликалаби пайдалахIедирес хIедирехIе. БегIлара асарчебси тяхIяр саби вакцина барахъни. Нушала вакцинаби лерни, гIяхIси саби, ва илди ибкьти аги-кьяйдализирад дурадухъес, урехи камбиахъес къайгъибирехIе. Ил багьандан изайзибад мяхIкамдеш бирахъути гIягIниахълуми пайдаладирес ва, виругIевли къалабали вакцина барахъес чебиркур», —рикIи ил.
ДР-ла арадеш бихIнила Министерстволи изайзибад мяхIкамдешлис маслигIятбирули саби:
— бахъал адамти цалабиркути мераначи хIебашахъес;
— цаличибад ца 1,5-2 метрла тяйдили буахъес;
— жамигIятла транспортличир ва цархIилти мераначир дяхIликалаби дихахъес;
— някъби бактерияби дубкIахъути секIултачил ицахъес;
— коронавирусла чейхъуси изайс къаршидеш дирнила, илала декIти асурти хIедирахънила бегIлара асарчебси ва цаси тяхIяр – вакцинация.
Вакцинаби дируси гьарил пунктлизир хIушаб насихIятуни дуру. Прививка адам хIисаблизи касибси мерличибцун ахIенну барахъес вируси, республикала дигусигъуна пунктлизибра (вакцинаби дирути 86 стационарла ва 47 мобильный пункт), адамлизир дарх паспорт ва СНИЛС диэс гIягIнили сари.
ХIушаб хIушала арадеш хIяжатси биалли, яра хъулиб къиянси чейхъуси изайс къаршидеш дарес хIебирути дурхIни ва гьести гIямрула гъамти хIербирули биалли, вакцина бирахънила хIяракат гIелайзи армахидая. Иммунитет кабизахъес замана хIяжатси саби!
