Регионтас бекIдешдирнила центрлизиб «Берк-бержла масанала багьни ахъдиъни» темала чебкад журналистуначил гьунибаъни бетерхур. Балбуц дураберкIиб ДР-ла шила хозяйствола ва берк-бержла масанала министрла заместитель Э.ШайххIясановли.
«ГIергъити бурхIназиб овощунала багьни ахъдиъниличила дахъал гъай детаур. ХIушанира балуливан, илди сари набадури ва кьехIе. Ил бархбасунси саби ириъла пандемияла манзил илди овощуни камли удатниличил. Нушала запасуни камдиънили, илди дирцантани багьа ахъбурцули саби. Багьначи хIеруди бузахъуси биалли нушани ахIен. ЖумягI байхъала дикили гIергъи, ишдусла сагаси сабухъ бируси саби — 6 азир тонна овощунала. Илди продуктунала кьадар цархIилти регионтазибад дигахъуси саби. Мисаллис буралли, набадури Волгоградлизирад, жерши Астраханьнизирад дихути сари, илкьяйдали картошкара. Капуста биалли, нушала мер-мусаличир дахъал дашахъули сари, хIятта нушани илди дицес кумекбарахъесра Россияла шагьуртачил бархбасуни кадилзахъулира. Илди илцадра дебали хIяжатли ахIен, дила пикрили, сенахIенну капуста Россиялизирра дахъал лер ва ишарад духибти гьуни-харжани хIисабдаралли, дурхъали кадилзули сари. Овощуни диъличил цугдуцалли, мазала ва хIяйва диъла багьа илцад-декIар барсхIебикIули, цаван кавлули саби», — викIи ил.
Диъла багьа дирути хIянчиличи цугси саби, сенахIенну букIунна хIянчи къиянси биъни ва гьаннала замана букIунни бузес иштяхIла бегIти камли сабни лебтасалра гIячихъси саби. Гьанналис, диъла багьни ахъхIедирниличи вирхес вирар, сенахIенну, хIяйвантала дуки-гьундурала мер-мусаличир яни кьяркьти дакIили диалра, бусягIятла манзил даркьибти мукьри, къачни лер.
ЦархIилван буралли, овощунала ва цIедешла багьни дарсдикIни дигахъуси саби цархIилти регионтала бархбасуназибадра, сенахIенну имцIатигъунти иларад сари нушачи диахъути. Ил вачар-чакарла бархбасуназиб чараагарли дакIубулхъуси анцIбукь саби — тIалабуни хIясибли багьнира дарсдикIни. БусягIятла манзил туристуни имцIабиъниличиблира бахъалгъунтани цIедешла багьни ахъдурцули сари, хаслира — Дербентлизир. Амма ил анцIбукь дусла манзилтачилра бархбасунси саби.
ИшбархIила замана республикализирад дурала улкнази дихути масанира лер. Биринж исули сари Иорданияли, Данияли, Шотландияли, Туркменияли, Казахстанни ва Таджикистанни. Мазала-мас биалли, Иранни, Грузияли, Азербайжанни, Узбекистанни. Берк-бержла продуктуни дурайанти фермертира, гьайгьайрагу, чус хайричебси ва адамтала тIалабуни хIясибли секIал дурайэс саби пикрибикIути.
Э.ШайххIясановли бурни хIясибли, гIягIнити журала берк-бержла продуктуначил нушала республика сунени саби гIеббуцес багьандан, аргъ-бархIила ва географияла шуртIри хIясибли, фермертас къулайти шуртIри акIахъести тяхIяр-кьяйда далдурцули сари.
