ГIергъити дусмазир дубурла шимазир чула ши-шантас хасдарибти къугъати шадлихъуни дурадуркIни гIядатли бетаурли саби. ЦархIилтас гIелабулхъули ахIен Дахадаевла районна шимала жамигIятра. ХIера, гьалабван Кьункьила шилизибра дебали жагаси шадлихъ бетерхур.
Ил байрам сабри ветерантала, чулира ибкьси бузериличил шила кабиз жагабиахъубси. Шайчиб кахIелун шила жагьилтира. Илдани чула бегIтас ва гъамтас биубсигъуна кумек гIеббурцусири ва шилизир ишбархIила сагадешуни дакIудирахъутири. Илкьяйдали наслубани гIяхIтигъунти гIядатунира культурала бетуцунира чеалкIуси наслулизи диахъули сари ва челябкьлализир шантала гIямру эркинтили диахъес къайгъни дакIудирули сари.
Лерилра илдигъунти бетуцуни пикрилизи касили, шилизиб хIербирути ва дурала мерличибти Кьункьила шантала ургарти бизи-ванадеш къулайдиахъес багьандан илгъуна шадлихъ дураберкIни дигесира саби.
Савлиличирадли шила школала мер-мусаличир нушала хала бегIтани дузахъули калунти гIягIниахълумала ва палтуртала выставкаби дурадеркIиб. ЗайдикIулри жагати, пергер макьамти.
Жагали бегIбиубти кьункьанти байрамласун жагабарибси школала майдайчи цалабиркескабииб.
Шадлихъла балбуц абхьахъес ихтиярбарили гъайбухъунти шила хIурматла адамтани лебилра цалабикибти мубаракбариб. Балбуц бузахъуси районна собраниела депутат СалихI СалихIовли шадлихъла программаличил цалабикибти тянишбариб.
Балбуцличиб лебри районна бекI Жаруллагь ГIямаров сунела хъалибаргличил, районна депутатунала собраниела председатель ХIяжи Машаннаев ва районна бекIла кумекчи Рабазан НухIкьадиев.
Шадлихъличи бакIибтас выставкаби ва миллатла берклуми гьаладихьиб, шила гьести гIямрула адамтани чIап бирнила шайчир дурадуркIути устадешла дурсри чедаахъиб.
Цалабикибтала гьалав гъайухъунси муниципалитетла руководительли Кьункьила шантас баркаллала гъай дуриб.
«Бухъянси ва гьамадли ахIенси гьуни ахъили саби кьункьантани. Хала дудешунала гъабзадешличирли ва гъирачебдешличирли къиянти дяхIяэс ва чеалкIуси наслула гIямрула шуртIри къулайдиахъес имканбакIили саби. Илкьяйдали ши гьалабяхI арбякьунси ва халакабаибси саби. ИшбархIила сархибдешуни ва чедибдешуни чумал наслула рухIла ва адабла цIакьанала гIяхIдешличирли сари детаурти.
Кьункьантани чула шиличи ва илала тарихличицунра ахIи, илаб акIубти багьадуртачира пахрубирес бирар. Илабадти гIяхIгъубзнани район ва республикацунра ахIи, улкара машгьурбарибси саби.
ИшбархIи хаслира гьанбушес дигулра шила школалис сунела у бедибси Гьарун Кьурбановличила, сунелара гIямрула гьуни 10 дус гьалаб къачагъунани къябаибси.
Сецад дусми ардукьялра, илгъуна лебтанилра халаси хIурматбируси ва бахъал халкьлис гIяхIдешуни дирули калунси адам гьанна нушачил варх агни марбарес гьамадли ахIен.
Ахъти ва жагати чарх-бекIла вегI, кабизалачевси, малхIямси, адамтачи дигили вицIибси ва гьар шайчивад чеветаибси гIяхIгъабзали даимлис кавлан Гьарун Кьурбанов сунела гъамтала, юлдашунала, шантала, барх бузули калунтала уркIбазив.
Халкьлизиб бурули бирар, адам хIерируси сай, иличила гьанбиркахъули лебай, нушанира иличила хъумхIертехIе ва чеалкIуси наслулизи сунечила чедетаахъили баянти диахъехIе», — буриб Жаруллагь ГIямаровли.
Жаруллагь ГIямаровли Баркаллала кагъурти дедиб шилизибти бузерилизиб ва пагьмулашал декIарбулхъути адамтас.
Кьункьанти шадлихъличил мубаракбариб илкьяйдали районна депутатунала Собраниела председательлира.
Балбуцла башрилизир дахъал къугъати гъай зайдухъун шила хIурматла адамтас. Илди чеалкIуси наслулис гIибратли бетаъни дигеси саби ва илдала лебтанилра халаси хIурматра бируси саби.
БархIиличи-бархIи Кьункьила ши хала ва жагабикIули саби. Илгъунали вегIла ши бетаахъес багьандан шантазибадлира дигахъуси саби. БегI гьалабси яргализиб илдигъунти адамти саби бикIули, Мурсаали Маммуевла, Нуруллагь Кьурбановла ва СалихI СалихIовла уми гьандушиб балбуцличир.
Балбуцличи цалабикибти ца халаси хъалибаргличи мешубиркулри. Илкьяйдали вайличира гIяхIличира цабалги дурабулхъути кьункьанти цархIилти шимала жамигIятлисра мисалли бетарули саби. Чула гIяхIти баркьудлумачибли декIарбулхъути шабагъатлабирулри шадлихъличиб ва гьарил илгъуна баркьудилис гIергъи шила культурала Юртла художественная самодеятельностьла бутIакьянчибани далай-делхъла агурби зайдулхъахъулри.
Шадлихъличир чула пагьмурти чедаахъиб Умайра ШяхIбановани, Муминат Кьурбановани ва шила шантани. Бахълис гIяхIбизур сирилизи виштIаси каркьуси гIядат.
Шила администрацияла бекI Байрамбег МяхIяммадовли бурни хIясибли, Кьункьила шила бархIи бегI гьалаб саби дураберкIибси. Шадлихъ дурабуркIниличи гIяхIси хIядурдеш бариб Нуруллагь Кьурбановли. Шайчиб кахIелун мерличибти депутатунира баркьудила адамтира.
Давлачебси кьумурличи лебилра жибариб.
Шадлихъ таманбиубли гIергъира гIяхIлас чула хъулрази чарбухъес дигусигъуна ахIенри. Илдас Гьарун Кьурбановличила жузи ва цархIилти савгъатуни пешкешдирулри.