Бусурмантала уммат цабиахъес ва уржили хIербиахъес ишбархIила манзил дахъал далдуцуни дурадуркIули сари: дигалли динничил, спортличил дархдасунти, дигалли культураличил. Илдала сияхIлизиб декIарси мер бурцули саби гIяхIбаркьла баркьудлумани. Гьар дус «Инсан» фондли дурабуркIуси «Рабазанна чятир» гIяхIбаркьла балбуц, сунезибра адамти барх дуббалтути (ифтар), мурталраван ишдусра бетерхур. МяхIячкъалала бекIлибиубси ЖумягIла мижитла гьалабси чятирлизир, коронавирусла чейхъуси изала тIинтIбирнила урехи кални багьандан, столани гIягIниси кьадарла ургаб мер батурли (1,5 м) кадихьибтири, илкьяйдали чятирла гьалабси майдайчира дархли. Берклумала сияхIлизи кадерхур: плов, кьацI, чумиздагуни, шин, сок, цIедеш, хиярти ва помидорти. Ила хьунул адамтани хъулир дарибти чудни, пирожкиби ва муридешуни дихулри. Гьаларти дусмазир ил мижитла гьалабси чятирлизир гьар бархIи хIябал азир порция пловла дедлугутири.
Илала дурабад, шагьарлизир гIуррара 15 мижитлизир илдигъунти чятирти дузахъулри. Илабра гIяхIцад адамти дубкабатахъес имканбакIиб. Илкьяйдали адамти дуббатахъес чятирти республикала лерилра шагьуртазирра дузулри. Рабазанна чятирлизи гIяхIладли вакIибси Россияла бусурмантала динна Идарала бекI, муфтий Альбир-хазрат Кргановли ца бархIи адамти дубкабалтахънила (ифтарла) харжани сунечи чеасиб.
Ириъла пандемияла манзил гIяхIбаркьла «Инсан» фондли, гьар хъули диахъули, 120 азир порция хурегла дутIибтири. Илдас харждариб адамтани Рабазан базлизир дучибти 4 млн.800 азир къуруш арцла. Чятирти дузули диалра, ишдусра фондла хIерудилиубтас хурегуни хъулира даахъибтири.
«Илала дурабад, ишдуслизир халаси кьадрила хIябал балбуц дурадеркIира. Цаибилгъуна бетерхур лебил республикализиб Рабазан базла цаибил бархIи. 45 тонна продуктунала харждарили, 7,5 азир хъалибарглис берк-бержла продуктуни даахъира. Калунти кIелра детерхур базла байхъайчир ва базла ахирличир – Хала БархIила байрамлис гьалар. Илкьяйдали, дубкабатес хъули баэс балкьхIеурли, гьундурачиб калунтас, гIядатлибиубливан, шин ва чумиздагуни дуртIули, саби-гIяхIъулати кумекчиби гьар бархIи шагьарла кьакьурбазиб бузули калун.
Илкьяйдали, Хала БархIила байрамлис нушала фондла хIерудилиубти цIуръабас, бахъал биштIати лебти ва мискинти хъалибаргуназибадти дурхIнас муридешунала кьачIни дутIира. Илгъуна балбуц дураберкIили дурхIнала Юртаназира хIязла ваяхI ва савгъатуни даахъира. Ишдусла Рабазан баз майла 9-личи къаршибикни багьандан, дявила ва бузерила ветерантира пикрила дураб кахIелун. Ишдусра, гьаларти дусмазир кьяйда, нуша цунти бухънабачи ванати палтарличил ва берк-бержла продуктуначил даира. Ил балбуцла мягIна, беркеси баахънилизибцун ахIенну, илдачи пикри бяхIчиаили, кадиили илдачил ихтилатбарили, дарх дубкадатнилизибра саби», — викIи фондла директор МяхIяммадрасул ГIяхIмадов.
Илкьяйдали, Дагъистанна лерилра шагьуртазир ва районтазир абхьибти «Инсан» фондла филиалтани къиянти гIямрула шуртIрази бикибти адамтас кумекбирни гIядатли бетаурли саби. Илди саби: хъулри цIали дигубти, машинала бехIемцIунази бикибти, декIси изай зягIипбикибти ва бахъал цархIилтира. Илди лебилра арцличилра гIягIниси журала тухтуртала кумекличилра гIеббуцибтири. Ну дебали разилира илдигъунти баркьудлуми Дагъистаннизир гIядатли детаъниличи, сенахIенну къияйзи викибси гьарил адамла мурталра имканти дирути ахIен ва гьабатурси кумекла някъли уркIбазиб гIяхIдешличи умут кавлахъуси саби. Ишди бурхIназиб, Избербашлизиб цIала балагьлизи бикибси хъалибарглисра уркIи изути адамтани фондла счетличи илдас арц дурхьули сари… ХIушара шайчир мадуудая, вегIлисра се кьадарлил багьес хIейрарну. Адамлис кумекбирни — ил дебали халаси кирила хIянчи саби, иличила ишгъуна мягIнала хIядисра леб: «Къияндикибсилис садакьалис дедибти арц, бегI гьалар Аллагьличи (с.т.) диути сари». ЧевяхIси Кьудратла ВегIли гIяхIти кьадурти лукIаб, арадеш каммабараб…
