Сергокъалала библиотекализи рухIнарухъунхIели, вецIанадли дусми гIеладяхIли чардухъунтиван бизур. Нушала нешанани ва хала нешанани челгьутигъунти хIевни, кIунби чебли даргала рурсбани виштIаси сирила калтнила гIядат чебаахъес хIядурбикIулри. Илдала гьайбатли зайбикIуси далайла къугъаси тIамали дурхIядешлизир дубуртазир деркIибти талихIчерти бурхIни тамай хIулбала гьала лагдизахъур. Илди мурити хIяланазир ну сеннира черсаргъес рирули ахIенри ва ишхIелла хIякьикьатличи хIерирхусиван, кIел манзилла ургар хIяйранни тIашризурсиванри.
«Агь, хIушаб хIялалдиъ, гIяртистуни биалрира буиши, илди мугIяллимтала пагьмуртани чи-дигара тамашавирахъугу», — ибти дила пикруми къябаиб нешла мезлис хасбарибси балбуцличиб зайбухъунси даргала гимнла гьайбатси тIамали. Ил гIеббуциб балбуцличи цалабикибти лебтанилра.
— Дарган дугьбачил нуни
Иш шадлихъ бехIбирхьулра,
Иличи валхIейкибси,
ВирхIейрар, ну рирхулра.
Нешла мез мяхIкамдарес
Мурад саби ишбархIи,
Ил пикри бурхахъутас
Арадеш габ Аллагьли, — балбуц ибхьули, малхIямли гъайрикIуси Краснопартизанскла школала нешла мезла мугIяллим Насибат ХIяжиевала тIамали цалабикибтала пикри битIакIиб.
— Салам, хIурматла дарганти, ишбархIи хIуша иша цаладикилрая дарган мезла хIурмат ахъбурцнила ва илди гьаладяхI дашахънила мурад бетерхахъес багьандан. ВегIла ВатIайчи диги нешла мезличил дирар жагали иргъахъути ва иш балбуц Дагъистан 100 дус биънила анцIбукьличилра бархбалсахъехIе.
Нушала хIурматбирули иш балбуцличи бакIибти гIяхIлас хаслира халаси баркалла багьахъес дигулра.
Сергокъалала районна школабазибадти нешла мезла мугIяллимтани Дагъистанна лерилра миллатунала мезаначил Р.ХIямзатовла назмула кьани белчIун.
УбяхI МулебкIила школала ручIанни сунела шилизивадси поэт Казимбек Рабазановла нешла мезличила назму белчIун. ГIур цархIилти бучIантанира мугIяллимтанира назмурти делчIун.
Зайдухъун илар хIурхъантала жагати далуйтала, делхъла агурби ва школьникунани инсценировкаби чедаахъиб. Лебтасалра гIяхIбизур Гьидаят МяхIяммадовани белчIунси далай.
Гъай бедиб А.ГIябдулманаповази.
— АхIерти сергокъалаланти, узби ва рузби, хIушаб халаси баркалла ишгъуна жагаси шадлихъ дураберкIнилис. Ишди бурхIназир нешла мезлис хасдарибти дахъал декIар-декIарти далдуцуни детурхули сари, амма Сергокъалализибсигъуна гьар шайчибад чебетаахъили дураберкIибси цалра чехIебаира. Дила пикри хIясибли, сегъунти миллатунала далдуцуначи рукьяслира дарган мезван жагали зайдикIути агара. Амма бархIилис чумал школализи рашухIели, дила уркIи бисули саби, мез дахъ вайтIа пайдаладирухIели дурхIнани. Кайсули ахIен даргантала дурхIнани «Лачин» журнал ва цархIилти газетаби-журналти. Илкьяйда асухIебирар. Газетаби-журналти пайдаладирес хIяжатли саби мугIяллимтани дурсрачир. Миллатла мезани дубкIнила халаси урехи лебниличил бархбасахъи, нуша дурхIначил мурталра нешла мезличил гъайдикIес хIяжатси саби.
ГIур нешла мезла мугIяллимтани виштIаси акIубхIели, хIурхъантани дузахъути гIядатуни чедаахъиб. Зайдухъун илар виштIасилис дучIути гардла далуйти, мубаракла дугьби. Ил лебгIеб жагаси гIядат халати устадешличил чебаахъиб илабти «нешанани», «хала нешанани», «тухумтани», «унрубани». Иличиб дигеси анцIбукьра къугъаси гIядатра гьатIи биэсра хIебиригу. Кьумурра бицIахъиб хIурхъантани бизити берклумачил. Ил балбуц жагати делхъличил хъараахъур «дурхIя акIнили» шадбиахъубти «гъамти-тухумтани».
КIинайс гъай бедиб П.Кьурбановази. ХIурхъантас баркаллала дугьби дурили гIергъи, илдас иш назму багъишлабариб:
Гъабзадешлис бурибти
Багьадуртала къала,
Дагъистанна дай уркIи
Хабарла Сергокъала.
Дубурла лачинтиван
УркIби чIумати уршбар,
Гьалжанала чатIниван
ХIекьли исбагьи рурсбар.
ХIу машгьурбиахъубри
ГIякьлучебти гIялимта,
Закличи ахъбуцири
Пагьмучебти шягIирта.
Дунъя гIяшикьбарибси
НурмяхIяммадовла у
Саб хIела михъирличиб
Орден даимлис ухул.
Игитуни илгъунти
Бахъбааб гIурра хIела,
Халабааб сайгъунти
ГIулухъаби хIурхъила.
Балбуц даимбариб гантри дирнила гIядат чебиахъниличил. Сецад жагатирил гьар секIал илхIели мугIяллимтани гьаладихьибти. ХIянчи гьамадбиахъес багьандан дучIути далуйтала дурарадлира, илар гантри хIядурдирнилис хасдарибти гIягIниахълумира лерри.
С.ХIяжиеванира жагаси ва халаси шадлихъ дураберкIни, илдани хала бегIтала гIяхIти гIядатуни даимдирни багьандан, баркалла багьахъур.
«…Илдигъунти къугъати далдуцуначи нуша мурталра дашутира ва уркIи-уркIиларадли гIеббурцутира. Ишдуслизир гIяхIцад нушала лукIантала юбилейти дурадуркIехIе. Илдазир хIушанира, хIурматла мугIяллимти, бутIакьяндеш дарили дигахъира», — рикIи ил.
Гъайбухъун поэт Казимбек Рабазановра библиотекала заведующаяра. ГIур нешла мезла мугIяллимтас грамотабира савгъатунира дедиб, районна багьудила управлениела ва Басир ГIямалаевичла гъамтала шайзирад.
Ахирличиб хIурхъантани давлачебси кьумур гьалабихьиб. Илар гьар-урла ва ишбархIила гIядатлати берклуми лерри.
