Бахъал халкь цалабикибси мерличир дахъал пикрумира, дурули сари. Гъамсила балгIяличир кариибхIели, цалабикибти хьунул адамтала пикрумачи лехIризурра. Илар гъай детаур дяхI кIапIдарили башути хьунул адамтачилара.
Бахъалгъунти хьунул адамтани, кьакьала хяса-пухI ушкути, духъянти хIевнира, бекIла гъезличил дарх дяхI кIапIдирути цIудара чабнира, уркIи-уркIиларад далтIулри.
Марлира, шагьарла кьакьурбазиб, автобусуначиб дяхI кIапIдарибти хьунул адамти къаршибиркули саби. Илди, бархIиличи-бархIи, бахъбикIули саби. ДурхIни кабалтути уркурабачил, хIябал дусра хIебиубти, кIел-хIябал, цагъунти биштIати дурхIначил, автобусуначи абицIули къаршибиркур илди. Амма илдачил мурул адамти рахлира барх хIебирар. ДяхI кIапIдаресли, динничи кабизурти биалли, чучил варх мяхIрам агарли, хъулибад дурабухъес илдас асубируси ахIен. ХIебиалли, илдани бусурман динна лерилра гIядатуни дузахъули ахIен.
Бусурман хьунул адамлис сунела чархла къалип хIебалахъуси хIевара, бекIла гъез кIапIдируси чабара дихахъес диннизиб чебаахъибси саби.
ГIяхIцад дусми гьалар, ну ГIярабияла Эмиратунази рякьунхIели, илабти хьунул адамтани дила нешлагъуна чабара, гьарзаси, цIяба рангла хIевара дихули биъни пикрибарибсири. ГIярабла хьунул адамталагъунти палтар дихутири, дила нешли ва иличибра гьести гIямрула СирхIяла хьунул адамтани. ГIур, дила нешличибра гIямрула биштIатани жагати кIунби чедирхъес бехIбихьиб.
Гьанна бусягIятра, нушала хьунул адамти бекIла гъез гьаргли башули ахIен, жагьти рурсби биалли, тамай гъез кIапIдарибти, дебали далдикибти, жагати кIунби чедирхъес ва дихес бурсибиубли саби.
Чечняла Республикала бекI Рамзан Кьадировлис мурталра баркалла рикIусира, лебилра сунела миллатла хьунул адамтачи бекIла гъез кIапIдарили башахъес хъарбарибхIели. Илала хъарбаркьра лебтанилра бетурхахъули саби. Илкьяйдали Чечнялизиб, дяхI кIапIдарили башахъесра хьунул адамтас къадагъабарили саби. Илгъуна къадагъаличира ну къаршили ахIенра.
Гьайгьайрагу, гьариллис, хьунул адамтасра, сунес дигуливан вегIиубли вашес вирни, азаддешла гIяхIцад халаси бутIа саби, амма азаддеш лебтанилра бархьли пайдалабарес гIягIниси кьалли.
Нушала республикализибси азаддеш, наб дигутани виркьулра или кьабулбирниличи разили ахIенра. Халкьла гIядатлизир агарти, гьачамалра нушачир хIедузахъути палтарли бегIбиубли хьунул адамти башни балбикибси ахIен или пикририкIулра. ЦархIил секIал пикрихIебаралра, кьакьурбазирти нясдешуни чула хIевала хьарличил ушкули, илдани чула арадешлис заралбирули саби.
Муъминат Хаттаева
