ГIергъити дусмазиб Дагъистайзир шагьурти ва шими- ургабси бархбасла суал алкIули саби. Жагьти халкь шимазирад шагьуртази гечбирули чебиур. Бахъалгъунти, школа таманбарили гIергъи, башули саби университетлизиб яра колледжлизиб белчIуди даимбарес, багьудлуми касес. Ва шагьарлизиб гIяхIбизурли, шимази чарбулхъес дигули ахIен.
Пикриухъалли, шагьарлизир узес, белчIуди касес дахъал имканти лер: ишар сари университетуни ва колледжуни, арц дарес узес дахъал хIянчи, гьалмагъуначил замана беркIес ва бамсриахъести, культураличил тянишиэс вирути мерани лер. КъантIли буралли, шагьар – жагьилти халкьлис бегIлара гIяхIси мер саби. Ишар илдас чула лерилра хьулани детерхахъес имканбикIур. Амма нукьсандешунира шагьарлизир лер: ишабти халкь мурталра гьалакбикIули саби, шагьарлизиб шилизибгъуна тIабигIят агара, шагьарлизив адам сайцун кавлули сай, сенахIенну илаб гъамти камлихIели.
Шимани биалли, Дагъиста культурала бекIлидиубти хьулчни чузир мяхIкамли дихIули сари. Илар сари имцIаливан халкьли гIядатуни дузахъути, нешла мезли гъайбикIути ва чула дурхIназира далахъути. Шилизиб лебилра саби-ургаб гъамти саби викIалра, хатIа бетхIерар. Ил багьандан адам сайцун кавлули ахIен, илис сегъуна-биалра кумек хIяжатбикалли, лебилра шила халкьли илис кумекбиру. Шилизиб жагаси тIабигIятра саби, илис зарал хIебарес халаси гъаза биру шантанира. Амма шилизиб хIербирутасра нукьсандешуначил бяхIигес кьадарбирули бирар: ишар хIянчила мерани дебали камли сари, школа ахIи, гIур дурхIялизи белчIуди касахъес сегъуналра учреждение агара.
Илдигъунти декIардешуни сари шагьарлара шилара. Нушаб севан хIейгахIелра, шимазиб хIербирути халкь камбикIули саби. ХIянчи багьандан, лебтасалра шагьарлизиб хIербирес чевкъули саби.
Амма нуни гьаннара якьинни балули ахIенра чинаб гIяхIсил хIервирес. СенахIенну шагьарлизир ну ручIулра ва рузулра, амма уркIи шилизи, бегIтачи рукьес даим гьуцIбикIар.

Ханум ГIялиева