Чи саби игитуни? БекIахъудилизиб нушаб имцIали игит ибси дев къаршибиркули бирар. ЦархIил адамла жан дерцахъибти, жамигIятлис пайдалати анцIбукьуни дурадеркIибти, ВатIайс къарайучибти адамти саби игитуни. ИшбархIила манзиллизиб нушала улка мекелли ибкьти аги-кьяйдализиб саби. ВатIа хъархIерагардеш калахъес къайгъилизибти бургъантас игитуни хIеили, гIур чи дикIутирав нуша. Бахъал леб бургъанти-ургаб саби-гIяхIъулали дявила хасси балбуц бетурхуси мер-мусаличи арбякьунтира. Илди сабигу гьарли-марти гъубзни ва игитуни. Сай-гIяхIъулали дергълизи гьарил адам укьес вируси ахIен. РухIлашал дебати, ВатIайчи дигичебти, халкьла челябкьлаличи пикрибикIути гъубзни саби илди. ХIера, илдигъунтала къяйлизивадси сай дила макьалала игитра. Ил сай Сергокъалала районна Ванашимахьилизивадси Мутаев Мурад ГIямарадаевич.
Мурад Мутаев акIубси сай Ванашимахьила шилизив 1974 ибил дуслизив. 1991 ибил дуслизиб илини шила школа таманбарибсири ва ДГПИ-ла физкультурала факультетлизиб белчIуди даимбарибсири. 1995-2001 – ибти дусмазив ил Ванашимахьила урга даражала школализир физкультурала дурсри кадирхьули калун. КIинайс биалли, пачалихъла кабизлизиб Мурад
Мутаевли дахъал дусмазиб халаси хIянчи барибси саби. КIел азирлим цаибил дусличивад вехIихьили, кIел азирлим гъану цара ибил дусличи бикайчи ил Сергокъалала районна шайчибси ОМФД-лизив узули калун. Барх бузутани буруливан, М.Мутаев дебали чIумаси, бузерилис ва ВатIайс марси хIянчизар вирусири. Дявила баркьудлумала ветеранра сай ил. Мекелли халаси хIянчи илини дураберкIибси саби ихтияр агарли акIахъубти ярагъладарибти къачагъунала кьукьни тIутIукьякьядирнилизибра. Ил шайчив къайгъилизив узуси Мурад, итхIели чуйнара вяхъибсири.
Пенсияличи аваибхIели, Мурад ГIямарадаевич «Сергокъалала район» МР-ла администрацияла административно-правовой отделла начальникли ветаурсири. 2025 ибил дусла февраль базличивад М.Мутаевли август базличи бикайчи Сергокъалала шила администрацияла бекIла заместительла хIянчи бузахъусири. Ил мер батурли, 2025 ибил дусла сентябрь базличиб Мурад ГIямарадаевичли сай-гIяхIъулали вягIда бигьун ва Украинала мер-мусаличи арякьун. ВатIайчи къиян бакIибхIели, илаб хIербирути мурул адамтани саби ил балтахъуси или викIули сай ил. Гьанна бусягIятра Мурад Мутаев дявила хасси балбуцла бутIакьянчи сай. Илцадра уркIи чIумаси,
патриотизмала хIялани бегIлара ахъси даражаличир сунези минадиубси ва гьав ахъси ургъан, сунечи хъарти дявила хъарбаркьуни детурхахъули, чедиахъути гъабзадеш багьандан грамоталичил, михъирличи биршуси лишанничил, Баркаллала кагъарличил шабагъатлаварили сай.
Мурад Мутаевлис чIумаси арадеш, сабур ва цIакь дулгулра. Чедибдешличил, сунела дявила узбачил варх жяв-жявли хъули чарухъахъес балга бирехIе.
ПатIимат Шахова
