Гьанна дусличибра имцIали дявила хасси балбуцлизир бутIакьяндеш дирули, ВатIа хъархIерагардеш балтахъули, гъаб­за­дешличил бургъули саби Лавашала районнизибадти нушала бархкьяби Юсуп Ра­сулов ва Багьаутдин ГIялиев. Газетара ил­дачила чуйнара гъайбухъунси саби, биалра иш яргализив нушачи ургъан гьав­ва­кIибхIели, сагадан гIяхIгъубзначила гьанбикахъес хьулрухъунра.
СенахIенну илдани улкала гьалабси чула чебла асилдешличил ихънила дурабад, дявила къуллукъуни халати гъабзадешличил тамандиресра бажардибиркули саби. Юсуп Расуловла михъирличир Жуковла ва Суворовла умачилти ордентира лерри. Илданира дубурла гьунартачила ва игитдешличила бурули саби, илкьяйдали шабагъатунани ургъаннис дяхI-дяхIли душмайс къаршидеш дарес кьадарбиънилисра бикьридеш дирули сари. «Сунечи бяхъ чекасили, гехIел адамла гIямру дерцахъибти сари илини. Сай декIли вяхъили, арадеш къулайбирули вахъхIи калун. Гъамли илала гъабзадеш кьиматладирули, пачалихълира шабагъатлавариб», — илкьяйда бурули сай Юсуп Расуловли сунела гIямрула ва дявила юлдаш Багьаутдин ГIялиевличила.
ХIера, ил­ди­гъунти гьарли-марли къалала къалагъунти, рухIлашал дебати ВатIа асилти уршби саби илди.
«Замана» газетала редакциялизи (Баралра имкан лебли, ургъан нушачи гьавикIуси сай. Ил ва илала юлдаш гьанна редакцияла лебилра хIянчизартасра узбиван гъамтили бетаурли саби) камси гьунибаъни бетерхурли гIергъи, Юсуп Расуловличил Дагъиста печатьла ва багьахънибала Агентстволис бекIдеш дируси Арсен Юсуповличил ихтилат дураберкIесра имканбакIиб. УркIи гьаргси ихтилатлизиб СВО-ла бутIакьянчини дергъла аги-кьяйдаличила, бургъанти-ургарти дявила узидешличила, къуллукъуни тамандирнилизир алкIути къияндешуначила буриб. Илала гьанбикуни хIясибли, дергъла майдайчиб гьарил манзил бегIлара гIергъисили уббухъес асубири. Илдигъунти анцIбукьуназибра нушала бургъантани цалис цали кумекбирни, гIеббурцни дебали дигеси саби. Къияндешуназир сари юлдашдешра дебшладирути. Арсен Юсуповли гIяхIяйс арадеш ва гьарбизуни далгун, илкьяйдали чихъти гъабзадешла мисал чебиахънилис уркIи—уркIилабад баркалла багьахъур. Илини ургъаннис машгьурти дагъистанлантас – дявила анцIбукьунала игитунас хасбарибси «Чедибдешла энциклопедия»-ла чумал экземпляр пешкешдариб.
Сецад хIейгеси биалра, гьанна Юсуп Расулов дявила хасси балбуцлизив кIинайсра вяхъили сай. БусягIятла замана илис арадеш къулайбарахъес отпуск бедили саби. Ил заманара бургъантани арадеш къулайбирулицун буркIули ахIен. Гьалабванра Юсуп Расулов ва Багьаутдин ГIялиев чули дявила къуллукъуни тамандирули калунси ротализибти уршбас кумек бухили бякьун. Буралли, илди камси заманала бухIнаб ила кIина букьес бажардибикиб. Бургъантала гъай хIясибли, кумек цалабирхънилизиб илдас икьалабариб Лавашала кьацI дируси 4-ибил заводлис бекIдеш дируси Якьуб ГIябдуллаевли, «Шиниша гIинц» бикIуси туке вегIбекI МяхIяммад МяхIяммадовли, Лавашала «Хабар» бикIуси дурхIнала анхъла хIянчизартани, Насруллагь Насруллаевли, Ибрагьим ИсмягIиловли, Идрис ХIяжимяхIяммадовли, Каймураз БяхIяндовли ва цархIилтанира. Сабира бургъантихIели, илдани ункъли балули саби СВО-ла мер-мусаличибтас се­гъуна кумек хIяжатлил. Ил гIеббиахънилизи илданира белгиси пай кабихьиб.
ВатIайс къияндикиб­хIел­и, сегъунтилра васвасъала агарли ил батахъес ва халкьла паргъатдеш калахъес музабухъунти Юсуп Раслов ва Багьаутдин ГIялиев, илдачил барх лебилра нушала бургъантира чула хъалибаргуначи ара-сагъли чарбухъи дигулра.

Салимат ГIялиева