Февральла 23 — ВатIан балтахъанна байрам саби. ЦацабехIтас ил хIевзуси, акьуси бархIи саби, цархIилтас — хала дудеш, дудеш, узби мубаракбарес сабаб. ХIябэстани биалли, ил нуша гьанни ВатIан балтахъули алхунти бургъанти гьанбиркахъуси ва илдала хIурматбируси бархIи саби.
Байрам гьарил мурул адамла гъабзадешличила, ВатIан ва хъалибарг датахъес илди мурталра хIядурли биъниличила буруси дурхъаси лишанванра гьалабилзули саби нушаб.
Бурес чебиркур, гьарил-декIар мурул адамли някълизи ярагъ хIебуцалра, амма илдазивад гьарил сунела гIямрулизир кадиркути сегъунти-дигара анцIбукьуначи вяхIигули сай, чузирра чIумаси яхIла, жавабкардеш дихнила хIялани чедиахъути. Ил багьандан илди мурталра цархIилти гIеббуцес хIядуртили биэс гIягIнили саби.
Чи сая ВатIан балтахъан ишбархIи? Ил ярагъра касили, бургъантала палтарлира вегIиубси адамцун ахIен. Илди саби: дудеш — сунела хъалибарг багьандан се дигара барес хIядурси, узи — мурталра хIед кумекбарес гьалакси, тухтур — адамтала гIямру уцахъуси, мугIяллим — биштIати дурхIнази гьар секIал балахъуси.
Селис хIяжатси ил байрам? Дунъяличир лерилра секIал къалабали дарсдикIули сари. Илдигъунти аги-кьяйдализир мардеш ва гъабзадеш кьиматладирес хIяжатбиркур. Иш байрамлира нушази гьачам-гьатIи иличила гьанбиркахъули саби. Ил байрамли нуша Россияла тарихла хIурматбирес бурсидирулра. Буралли, илини наслубира цаладирхъули сари. Нушаб ВатIан ва илала хъархIерагардеш далтахъутас уркIи-уркIилабад баркалла эсцун саби кавлуси.

Ханум ГIялиева