Арбякьунси дуслизир районна духIнар детерхурти мер-муса къулайси тяхIярличи дурш­нила, халкьлизи бамс­ри­­ихъахъес, дурхIни хIязта бир­кьахъес мерани, гьундури къир­ли кадурц­нила шайчирти хIян­чила черкад чумал суал хьар­даира «Ахъушала район» МО-ла администрацияла архи­тектурала, ЖКХ-ла, мер-муса къулайси тяхIярличи дурш­нила, гьундурала хIян­чурбала, ванзурбала ва леб­дешла шайчиб бузуси управ­лениела начальник Зияудинов Юсуп ГIябдуря­хIи­мович­лизи.

– Сегъунти хIянчи дурадер­кIиб­тири арбякьунси дуслизир ну­шала районнизир?
– Арбякьунси дуслизир районна духIнар гIяхIцад хIянчи детерхурти сари гьундури къулайси тяхIярличи дуршнила шайчирти ва цархIилтира.
«Дила Дагъистан – дила гьундури» бикIуси республикала программала дазурбазир Ахъушала шила дайлабси бахъхIила мижитла мякьлабси гьуни къулайбарес дахъал хIянчи дурадеркIибти сари. Бетонни картIибси гьунила бухъяндеш лебси саби 331 метрла. Ил гьуни балбарили гIергъи, ахъти мегьла тIулрира тIашдатур, чиргъми даршили, халкьлис дугила замана башахъес гьамаддеш акIахъуб.
Илкьяйдали хIянчи детерхур Куркила шилизибси «Центральная» бикIуси, Зилмукьмахьи­лизирти «Мижитла» ва «ХIарбала» бикIути, Бур­­­хIи­мякьмахьилизи ка­­бурхуси Ак­сакъада­ма­хьилабси «Кавка» бикIуси ва Усишала шилизибси «Къарагул» бикIуси кьакьурбазирра.
– Районна бюджетлизирадти харжаначил сегъунти хIянчи детерхура?
– Гумрамахьилизибси «шуибил линия» бикIуси гьуни бетонра картIили къулайси тяхIярличи бушибси саби. Илала бухъяндеш 400 метрла лебси саби. Ил гьуни бетонни картIибси саби районна бюджетлизи дакIибти транспортла налогунала харжаначил. ГIур бюджетлизирадти арцлис дурадеркIибти сари Бутрила, Кавкамахьила, Урхьучимахьила, Шинкьбалакъадала шимазирти ва махьурбазирти гьундурачи бетон картIили, къулайси тяхIярличи дуршнила ва чиргъми диршнила шайчирти хIянчира.
— МухIела шилизиб балкьаахъурси «Гьанбикунала анхъ»-личилара бурили дигахъаси.
— МухIела шилизиб «Шагьарла къулайти шуртIри» бикIуси Федеральная программа хIясибли «ХIербиэс къулайти шуртIри» бикIуси миллатла проект бетурхахъули, СВО-ла бутIакьянчибас багъишлабарибси «Гьанбикунала анхъ» балкьаахъурсири.
Анхъ бирухIели дахъал хIянчи дарибтири: чIябарличи бетон картIили, къаркъубира кадуцили, гIур ил мер алавбуцили хIяри барили, чиргъмира даршили, шинишдеш биахъес вава-кьарра дегIи. Илди хIянчира районна администрацияла шайчибад халаси хIерудиличил детерхурти сари. «Гьанбикунала анхъ» кабизахъурси заманаличиб балкьаахъурсири.
— Гьаннала гIергъира хIу­ша­ла бузерилизир сархибдешуни имцIадикIаб, Юсуп ГIяб­ду­ря­хIимович!
— Нушала районнис бекI­деш дируси урегал дусла манзилла духIнар бажардичевси МяхIяч ГIябдулкаримовла къайгъиличил дурадуркIути хIянчи ва детурхахъути жура-журала программаби хIясибли проектуни дахъал сари: спортла ва дурхIнас хасдарибти майдунти, адамтас бамсриихъахъес дарибти мерани, къирли кадуцили, къулайси тяхIярличи душибти гьундури, ремонтдарибти школаби, больницаби, чумал шилизи газ ва шин дукахъиб, чумал шилизир «Гьанбикунала унхъри» ва гIурра дахъал цархIилтира секIал дарахъиб.
Ахъушала шила дайлабси Хала мижитлизи аркьуси гьуни балбарили, жагати ганзухъунира дарили, дехIибайчи башути ва чула цархIил къуллукъ лебли аркьути адамти баркалла бикIули саби районна бекIлис, Аллагьла ва халкьла шайчибад кирира, баркаллара сархили сай районна бекIли или. Хала Мижитлизи жумягI бархIи башути адамти Ахъушала шилизибадтицун ахIен, лебил районна духIнарти шимазибад башути саби. Ил багьандан, ил гьуни бахъал адамтани чебиули саби.
Гьаннала гIергъира МяхIяч ГIябдулкаримовлисра, илала заместительтасра, илдачил барх бузутасра арадеш, гьарбизуни, сархибдешуни диубли, районна халкьла шайзибад гьаннала гIергъира баркаллаличи лайикьбикили бузес ва хIербиэс кьадарбиаб!

С.ГIябдуллаева