Нуша бархьси гьуникад вяшдикIнилис бикьрили детарути баркаллала дугьбачил бархIи бехIбирхьес дигесли саби.
Сергокъалализибси цаибил школализи Воронеж­ли­зибси «Ю.А.Гагаринна ва профессор Н.Е.Жу­ковс­кийла дявила-гьавала академия» бикIуси ВВС-ла дявила белчIудила-гIилмула центрлизибад – оборонала Министерствола ВУЗ-лизибад кагъар бакIиб. Илаб мугIяллимтас ва администрациялис курсант — Мя­хIям­мадов Расул МяхIяммадсалахIович бяркъличи викахънилис уркIи-уркIилабадси баркалла балахъули саби.
«ХIушала багьудила учреждениелизир касибти мурхьти багьудлуми, кадизахъурти низам-кьяйда ахъси даражаличир дузахъни ва жавабкардеш дихни илини чедиахъули сай. Курсант санигIятлашал гьалавяхI арукьнилизир чедир гьандушибти сабабти чIумаси хьулчили детарар», — илаб белкIи саби.
Нушала хIянчизартала бузерилис ил чихъси кьимат саби. Районна вакилтани ВатIайс къуллукъбирнила гьуни даимбирниличи нуша дебали разилира. Челябкьлализибра илдигъунти дурхIни халабиахъниличи академияли нушачи бихьибси умутли чеимцIаси пахру алкIахъули саби.
АхIерти дучIанти, гьанна ишар касибти багьудлуми ва бяркъ — гIямрулизир пайдаладирнилис, ва санигIят руркънила гьунчир илдани хIушаб лерилра унзурби гьаргдирнилис мисалли детарули сари. Нушала курсантличи пахрубирулра! Улкала гьавала дазу мяхIкамбирусила гьамадси ахIенси ва хIурматла санигIят руркънилизиб Расул МяхIяммадовлис гьарбизуни дулгехIе!
Сергокъалала районна багьахънибала центр