Ишди бурхIназиб «Ахъушала район» МО-ла администрацияла бекI МяхIяч ГIябдулкаримов, ДР-ла Халкьла Собраниела депутат Нагьбар Кьурбанов ва Гьебала шила администрацияла бекI Ражабкьади Кьурбанов савгъатуначил гьунибаиб Гьебала шилизирадси СВО-лизир бутIакьяндеш дируси ГIяйшат СягIидовачил. СягIидова ГIяйшат СягIидовна сари гIяхIъулали дявила хасси балбуцлизир бутIакьяндеш дарес хьулрухъун. Военкоматлизи дугьаризурли, СВО-лизи рархьахъес тиладибарили, ил 2024 ибил дусла апрельличир ила аррякьунсири. Ил жагьил хьунул адамла гъабзадешла баркьудиличи бахъал тамашабиубти адамтира биуб.
СВО-лизир ГIяйшат ВатIайс къуллукъбирули дусцадхIи кали гIергъи, Бахмутлизир декIли ряхъибсири, душмантани Россияла бургъанти аркуси машинализи дронти игьубхIели. ГIяйшат цаэсил дагъистанлан хьунул адам сари илди анцIбукьуназир ряхъибси. Санкт-Петербурглизибси дявила госпитальлизи аррукили, тухтуртани ГIяйшатла арадеш къулайбирахъули шел баз калун. УрчIемал базла гIергъи арадешлизир нукьсандешуни камдиубхIели сари рузуси мерличи чаррухъунра или бурули сари илини. Гьанна илис гIурра операция барес гIягIнили саби, ил багьандан сунела гъамтачил рарх арадеш къулайбирахъули хъулир лер.
— Гьаланачи дебали къияннири ва халаси урехира лебри. Амма, гIур замана аркьухIели бурсикариубра. Рякьунмадан медицинала ротализир санитаркали рузули калунсири, гIур биалли полкла штаблизиб гьар бархIи солдатунала лугIи лукIули, чум отпускличи арбякьунал, чум отпускличибад чарбухъунал, чум бяхъибал дявилизиб ва илкьяйдали бархIи ахъибхIейс отчет бирули. Илаб бузули гIурра Дагъистайзибадти медсестра ва санитарка леб.
ГIяйшатла лебти саби хIябал дурхIяра, илди сунела нешли бихIули сари илини ВатIайс къуллукъбирухIели.
«ХIунтIена зубари» бикIуси пачалихъла ахъси шабагъатличира лайикьрикибсира, Президентла ХIукму хIясибли, – бурули сари ГIяйшат СягIидовани.
МяхIяч ГIябдулкаримовли ва Нагьбар Кьурбановли буриб сегъуна кумек гIягIнибикаллира чучи дугьарилзахъес. «ХIушала шилизиб ванзара лугехIе, ЧевяхIсини ахIерараби хIура, хIела гъамтира ва лебилра СВО-лизибти нушала бургъантира! Барес гIягIниси операцияра гIяхIти тяхIяр-кьяйдаличиб бетерхаб, гьатIи чемабуркъаб илгъуна нукьсандешра», – бикIи районна бекI ва депутат.
Аллагьли ахIерабараб ГIяйшат СягIидовара ва, илкьяйдали, ВатIа ва халкьла челябкьла багьандан бургъути, чула арадеш ва жан ахIерахIедирути гъабзадешла бегIти адамти!
(Иш белкI хIядурбирухIели баянти касибти сари ГТРК «Дагестан»-на МАХ-ла каналлизирад).
ХIядурбарибси – С.ГIябдуллаева
