МяхIяммад Тахсурманов,
РФ-ла журналистунала Союзла член

ГIяшул шурмази тоннель кавдуливан, гIилмула майдайчиб талихI баргили, илала кьар бекIличи абацIили, ВатIайс, халкьлис дирути гIяхIдешунала урунжунили бетаурти хабардерхурти гIялимтас, доктортас, профессортас багъишлабирулра дила макьала.
Журналист сайливан, уркIи-уркIилабад пахрубирулра машгьурти гIялимтили бетаурти хIябал даргайчи, чулира Дагъистан ва Россия чула пагьмуртачил гьаладяхI ардукибти, чучила дурала улкназирра хабардерхурти: Муртазаев Ахъай Кьурбанович, ИсмягIилов Муслим ИсмягIилович, Рабаданов МуртазагIяли Хулаттаевич.
Илди даргантала мурхьси ва халаси гIякьлу-дагьрила бузериличила, санигIятла устадешличила, адаб-хIяяличила бурес хьулухъунра. Чула гIилмула бузерила дурабад, илдани чебетаахъили гьунчибиркахъули саби жамигIятла-политикала хIяракатра. ГIилмулизиб сабухъчебли бузути илдала дахъал сари монографияби, хIялумцIлаби, сагадешуни ва сархибдешуни.
Буралли, илди итмаданал хан гьунчибад ахIенри батбихьибти. Бузерилизир ва гIямрулизир диуб дахъал катругунира, кьавкьатира, чукълумира, хъябагьрумира, амма чула сабурли, гъирали илди лерилра ахъили, гIилмула ахъанайтачи абацIиб.
Муртазаев Ахъай Кьурбанович
Илини гьанна гехIел дус Россияла гIилмула Академияла Дагъистайзибси гIилмула ва хIялумцIлабала Центрлис бекIдеш дирули сай. А.Муртазаевла ил халаси гьунарла, хIянчилизив ункъли бажардивиркнила хIясилра саби. Сунела асилси бузериличил илини бархкьябала ургаб халаси хIурматра сархиб.
Ахъай Кьурбанович узуси баягъи ил Центрлизи кадерхурли сари Х.Амирхановла уличилси физикала, Каспи урхьула биологияла сурсатунала, тарихла, археологияла, этнографияла, ХI.ЦIадасала уличилси литературала, искусствола, социальный бяхIчибизла ва экономикала хIялумцIути институтуни, дубурла ботаникала анхъ. Лерилра илди халати жавабкардешличил дузахъули сай Ахъай Кьурбановичли.
Дагъиста ва арагIебли Россияла гIилмула урибси хIяракатчили сайси ил РАН-ла ДФИЦ-ла гIялимтала Советла председательра сай. Физика-математикала гIилмуртала доктор, профессор, Россияла гIилмуртала Академияла гьарли-марси академик, 800-личирра имцIали гIилмула хIянчила ва монографиябала автор ишбархIира гIилмулизив сабухъчевли узули сай.

ИсмягIилов Муслим ИсмягIилович
Медицинала гIилмур­тала доктор, профессор, ДР-ла медицинала урибси хIянчизар, ДГМУ-ла хIулбала излумала кафедрала заведующий, 2010-ибил дусличивад дудешла у бихуси хIулбала клиникала генеральный директор Муслим ИсмягIиловли дахъал медицинала гIил­му­ла хIянчи делкIунти сари. Илдала лугIи 400-личибадра бухъи саби. Буз­ерилизи сагадешуни духI­на­каэс къайгънавиркьуси илини декIар-декIарти та­ма­шала сиптабира гьала­дир­хьули ви­рар.
М.ИсмягIилов «Цаси Рос­сия» бикIуси партияла регион­на политсоветла пре­­зидиумла членра сай. Че­биуливан, илини жа­ми­гIят­ла-политикала гIям­рулизирра жигарла бутIа­кьяндеш дирули сари.
Россияла хIулбала тухтуртала цалабяхъла член, «Вест­ник» бикIуси изданиела редак­цияла Советла член, лебил Россияла жагьилти гIялимтала конкурсла лауреат сайливан, Муслим ИсмягIилович гIилмула бетуцлизив даим гьалавяхI вашули чейур.
Рабаданов МуртазагIяли Хулаттаевич
ДГУ-ла ректор, Дагъистан Республикала гIилмула урибси хIяракатчи, профессор, ДР-ла Халкьла Собраниела депутат МуртазагIяли Рабаданов ахIерси республикалис ва илала халкьлис гIяхIдешуни дирес сеналра хIемсар.
Ил Евразияла улкнала уни­верситетунала Ассоциацияла член, кристаллография­ла гIилмула миллатла Комитетла президиумла член Мур­та­за­гIяли Хулаттаевичли гьанна Дагъиста пачалихъла университетлис 18 дус бекIдеш дирули сай. Преподавательтани ва профессортани сегъуна игьдибар бихьилил иличи?! Ил ректор вархьли, хIялай ва халати устадешличил узнила хIясил саби.
Илала дурабад, МуртазагIяли Хулаттаевичли дунъяла шуцIайчирра имцIали университетличил уржибти бархбасуни кадизахъурли сари (Турцияла, Египетла, ГIярабияла, Иранна, Италияла, Китайла, Японияла, Азербайжа, Колорадола, СНГ-ла ва цархIилтира).
Илди машгьурти адамтала жавабкарти хIянчи дарес дубураван халаси сабурра, урхьуван мурхьси яхIра, пасихIси гIякьлура, пагьмула бугадешра, чихъти адамдешра лер. Илдигъунти пергер къиликъуначил бегIбиубти, чула уми Дагъиста тарихлизи мургьила хатIличил делкIунти даргантас гьаннала гIергъира гIилмулизиб сабухъчебли бузахъес чIумаси арадешра ахъси гьавра дулгулра.
ГIямру дерхъаб хIушала,
Пагьму калаб мурталра,
ГIялимдешра мурхьдикIаб,
Машгьурдешра тIинтI­ди­кIаб,
ХIурмат-хатир дахъдикIаб,
Иманра имцIабикIаб.
Россияла мерличир
ГIилмула урунжуни,
ХIушала бекI гIинзурби
Гьар мурталра парчдикIаб!
Пачалихъла гIилмула
Ахъанайчи дааба!
Аллагьли хIушаб гIямру
Дигуцад пешкешдараб,
Неш-ВатIан Россияла
ГIилмура ахъбуцахъес,
Ва машгьурти дарганти –
Хабар халал гIялимти!
Дагъиста, даргантала
Саррая хIуша пахру!!!
Дарганти цабиахъес
Дахъ чIумали кайзурти,
ГIялимти бахъбаахъес
ГIямру мяштIхIедиранти.
Пагьмула черяхIдешли
Закличи адацIибти,
ГIилму-сиптакардешли
ВатIан дурхъабарибти.
Европала улкнази
Хабар тIинтIкабарибти,
Дунъяла гIялимтала
ХIурмат-хатир сархибти.
Закла капарайлизир
Зубартиван ухути,
Устазуналагъунти
Караматдеш дарх лерти.
Иш дунъяла гIялимти
Тамай хIяйранбарибти,
Эльбрусла дубуртиван
Адамдешлизир ахъти –
Даргала багьадурти!
Зак бицIибти урмицад
ГIялимти абикьурти,
Дунъяличиб Дагъистан
БерхIиван ухахъути.
Дубуртала адамтас
Ванаси БерхIи сарра,
Шалда зубарти сарра —
Дахъ машгьурти гIялимти.
УркIи-хIял сар хIялалти,
Зам-зам шинван умути,
Мардешлис адабчерти,
Мегь-шанданван чIумати.
Я арцлис асес хIейрар
ХIушала гIякьлу-дагьри!
Ургубалар вавницад
ГIилму-хIянчи делкIунти,
Галгаличир цIедешцад
Доктор–кандидатуни
ХIялай хIядурбарибти.
Иманра дин-исламра
Дай уркIбазир дихIути,
БегIтала гIядатуни
Дахъ мяхIкамли дихIути.
Дарганти-ургар хIуша
Зубартазиб бацгъунти,
ГIялимти-ургар хIуша
ВерхI-рангла зурхIябгъун­ти.
Кавладая байрахъли
Дагъиста, Россияла
Пагьмучебти гIялимтас
Гьуни чебиахъули.
ХIуша хIябалра сарра
ЧIумадешла дебш бархти,
Нушала улкализир
Даргандеш ахъдуцибти.