Ца бархIи бархIехъ, цIябдаибси ман­зиллизир (гIела гIебшни жявли цIяббирули саби) маршрут­ка­личи кариили рукьес хIяжатбикиб. Шо­фер кайруси шайчибси кIиибил къяй­лизибси мерличивси урши айзурли ну ка­риахъира. ХIулбала гьалаб, шофёрла къа­къла гIелабси мерличи баршибси мо­ни­­тор пархбикIули ухулри, гьар гьигьла ман­зиллис рекламаби дарсдикIулри. Марш­­руткаличи кайибсилис илдачи хIер­хIей­кIес гIямал аги, ухуси экранни хIулби су­нечи дитIикIулри.
ХIулбала гьалаб алкIукад кьяшми далкIли (косолапый) акIубси виштIасила сурат дакIубиуб. Илис гIелабад вайси изала арабарес Китайлизи укес хIядурварибси уршила, (дебали зягIипли виъни чебиулри) сурат ва арц кадихьахъес телефонна номер, илар дахъал рекламаби лерри, дахъалгъунти декIар-декIарти тухтуртала сарри.
Гьанбикиб, марлира илкьяйда асубирусив? Маршруткаличиб виштIаси уркIила удив бихути хьунул адамтира биэс бирар кьалли. Нушала хала бегIтаникIун нешанала ва алкIути дурхIнала арадеш ахIерабирули вайси секIайчи, чулахъсиличи, зягIипсиличи хIербикIахъес къадагъабирусири.
Адамтала арадеш руркъути гIялимтани дахъал секIал далули биалра, чебаибсилара, бетарусилара бархбасличила гьанналис селра белгили балули ахIен. Дила пикрили, бархьлири нушала хала бегIти, жагьти хьунул адамти ва алкIути дурхIни ахIе­ра­бирухIели. ЦархIилтасра, лебилра халкьлис, зягIипсиличи, язихъсиличи хIербикIес хIейгахъу, бархьли бурасли набра хIейгахъис.
Илала дурабадра лебилра нушала шагьар тухтуртала рекламабани баршили саби. Шагьарлизив марлира араси адам хIергар или гьанбикесли саби. «Кьукьубала ва кьякьубала биркIанти дарсдирулра», «ХIела нешлис хрусталик (хIуйзибси) хIяжатли ахIену, «Нешлис сертификат савгъатбара», илдигъунти гIурра дахъал цархIилтира рекламабала дахъдешли, адамтас илдазибад берцес имкан агара.
Лерилра тухтуртани дирути гIяхI­де­шуначилакIун мезличил буресра хIейрар, вебкIибси мицIирирули хIебургар, гIур илдани хIебируси агара. Арцра хIушара, нушачи даширая или жидикIули сари лерилра рекламаби. Гьарил гIеббиахъуси къуллукъла багьара леб. ВецIал минут тухтурличил ихтилатбарес кIел-хIябал азир бикIули саби. ДелкIунти дармунтасра, илдани сегъунтилра жавабкардеш дихули ахIен. Далдикалли дикаб, хIедикалли гIурра цархIил тухтур варгес умцIес гIягIнили саби. Гьарил тухтурли лукIути дармунтира декIарти сари, лебтанилра чули балуси арабарес чейсули саби. ЗягIипсила изала кабизахъес цалилра бирули ахIен.
Тухтуртачила вайси белкIес урехила биъни балулра, илдачикIун дугьахIейзес гIямал агара. Гьарил зягIипсира, сегъуналра реклама агарлира тухтурличи аркьян.
Лебилра зягIипти арабаресра тухтуртала имкан хIякьян, адамлис зарал хIебаралли баибси саби, ГипократликIун, «Селичибалра гьалаб — зарал мабирид», —или тухтуртачи хъарбарибсири.
Амма, дила пикрили, шагьар би­цIиб­ти рек­ламабани тухтуртала хIурматра булъули саби, шагьарла халкьла арадешлис заралра бирули са­би.

Муъминат Хаттаева