Дила халали ахIенси белкI вахъхIила юл­даш ГIяб­дул­муъмин ГIисаха­но­вич­личила, илала хьунул, дила кьариган Муъминатличила ва илдала пергер хъалибаргличила саби.
ГIябдулмуъмин се-дигара балуси гъабза сай. Илини хъулри лушнила кьялилизир, механизациялизир ва цархIилтира къуллукъуначир хIянчи гьунчидикахъес бала. «ХIулбани чебаибси някъбани биру», «Ца балусини лерил дала» – ибти буралаби ГIяб­дул­муъминничи хIекьли далдикили сари.
Сунечи дугьаизурсила мурадуни ГIябдулмуъминни разидешличил гьунчидиркахъу. Илини хIебалуси хIянчира хIебургар или гьанбиркур наб. Шантас гьарил ганзлизив багалавирар. Набра илини чуйнара кумекла някъ гьабатур. КъантIли буралли, уркIи бирхеси гъабза сай дила вахъхIила юлдаш ГIябдулмуъмин.
Ца-хIябал гъай ГIябдулмуъминна гIямрула рархкья Муъминатличилара дурес дигулра. Муъминат дила кьариган, кагибти хIял-тIабигIятличилси, къай­гъичерси хъа регI ва духути уршби-рурсби абикьурси неш сари. Шантачил, узи-уршиличил ралгунси, унра-хунрас кумекбарес хIядурси, муруйчил талихI­черти гIямру лушуси, пергер хьунул адам сари ил.
ГIябдулмуъминнира Муъминатли­ра чучибад акIубти урши-рурсилис гIяхI­си бяркъ бедиб. Урши ГIисахай Из­бербашлизиб юрт бариб ва сунела хъалибаргличил илав хIеркайрули сай. Рурсби Оксанара Ларисара биалли, Мя­хIячкъалализиб хIербирули саби. РиштIасигъуна рурси ПатIимат шила шко­лализир учительницали рузули сари.
Хала бегIтачив хIеркайрули лев ГIябдулмуъминнара Муъминатлара рурсила урши Рабазан Ибрагьимов. Ил кайзурси, серхурси спортсмен сай. ХIера, илини гьаларван Каспийск шагьарлизир Сергокъалализибадти гIяхIгъабза узби — ГIябдурашид ва МяхIяммад НурбяхIяндовхъали гьанбиркахъули дурадеркIибти спортла абзаначир бутIакьяндеш дариб ва 3-эсил мер буциб. Салимгерей Минатуллаев гьаниркахъули дураберкIибси каратэла чемпионатличир Рабазан Ибрагьимовлис цаибил даражала дипломра, кьиматчебси савгъатра дедибтири. ЧебяхIси Чедибдешла хIурматлис Орел шагьарлизир дурадеркIибти жагьилти-ургарти спортла абзаназир цаибси мер буцили, Рабазан Россияла чемпионна уличи лайикьикиб. ХIера, ишди бурхIназирра нуша сагадан разидарира Агара шагьарлизир детерхурти Россияла Гьалабдеш багьанданти абзаначир Дагъиста спортсментала цалабяхъибси командализир бутIакьяндеш дарили, Рабазан Ибрагьимовли цаибил мер буцнила хабарли. Улкала кIина чемпионна уличи лайикьикниличил Рабазан уркIи-уркIилавад мубараквирулра.
Дила шан, жагьси спортсменна шабагъатуначилси сумка ва илала бягIуси цIудара ири чедаибхIели, уркIи бахъ разибиубгу. Гьарра шайчивад ил гIевурцути, Бурдекила шилизибадти хала бегIти ГIябдулмуъминнис ва Муъминатлис гIямрулизиб игъбар биубли дигулра. ГIурра илкьяйда бегIтира, шантира пахрули биркьахъули, чедибдешличил гьалавяхI ганзикIен хIу, Рабазан! Спортлизир ва хIела гIямрулизир сархибдешуницун дираб!
ДурхIнала баркьибтани, илдала сархибдешунани разивирули, гIямрула рархкьячил талихIчевли калаби, дила юлдаш ГIябдулмуъмин!

ГIябдулхIяпиз ГIябдусаламов,
Бурдекила шила ветерантала ва халатала советла председатель