БегIти — нушала гIямрулизиб бегIлара ахIерти адамти саби. Илди гIямрулизиб нуша акIубхIейчирад мякьлаб бирар. Нуша сегъунти-биалра къияндешуначи дяхIягахIелли, бегIтигу бегI гьалаб кумекбарес дуцIбулхъути ва гьалакти. Се-биалра сагаси барес дигули диахIелли, неш-дудешлирагу нуша гIердурцути.
ДиштIахIейчирад бегIтани нуша гIямрулизир хIяжатти, багалати насихIятуни дурули, бархьси гьунчи кадилзахъулра, декIар-декIарти баянти гьаладирхьули, гьар секIайчи бурсидирулра. Илди чула дурхIнас се-дигара барес хIядурли бирар. Чула дурхIя разили, арали хIериахъес къайгъибиру.
Халаси хIянчи бирули саби бегIтани нуша адикьес, бяркъличи дикахъес. Ил багьандан, дила пикрили, бегIтала даим хIурматбирес хIяжатли саби. Чули секьяйда нушачи хIеруди бирусирил, илкьяйда нушанира бегIти хIерудиличил ва дигиличил алавбуцес чебиркур. Севан хIейгеси биалра, бегIталара дусми аркьули сари, илди дусличи-дус бухънакабикIули саби. ЦацабехIти биалли, бузесра бажардибиркули ахIен. Ил багьандан нушаб мурталра бегIтас кумекбирес гIягIнили саби.
Леб цацабехIти чула бегIти мучлаагарбирути. Илдигъунтас бегIтани се-дигара бирули хьалли, илдани я «баркалла» эс балули ахIен, я чус дарибти чедиули ахIен. БегIти бухънабаибхIели биалли, илди сабицун балтули яра гьести гIямрула адамтас хасбарибси Юртлизи (дом престарелых) бедлугули саби. Илдани гIур кумекбарес хIебирухIели, сен мучлаагарбирути?
Адамтала илдигъунти баркьудлуми сеналра мардарес хIейрар. СенахIенну бегIтанирагу нуша акIахъубти, кьяшмачи тIашдатурти, адикьурти.
Ахиличиб наб бегIтас халаси баркалла багьахъес дигахъаси, ну лерсигъунали арикьнилис, мурталра дила пикруми-кьасани гIердурцнилис, къияндешуни акIубхIели биалли — мурталра кумекбирнилис ва уркIичеррирнилис.

Ханум ГIялиева