Нушала республикализир гIергъити дусмазир гьундури къулайдирнила хIянчи миллатла проектла дазурбазир жигарчерли детурхули сари. МяхIячкъалализир духути «светофорти» дузули сари, гьундурачирти лишанти ва цархIилтира ункъдешуни чедаэс вирар. Къирли кадуцибти кьакьурби ва дахъал хъулрачилти юртани-алавти ункъдарибти мер-муса имцIадикIули сари. Илкьяйдали адамтала гIямрула шуртIрира къулайдиубли сари, бахъалгъунтала хъулрала гьалар кIел-хIябал машина лер. ИмцIатигъунти дурхъати машинабачиб башули саби. Иличи, гьайгьайрагу, разихIейэс хIейрар. Амма илди къулайдешуначи хIерхIеили, гьундурачир кадиркути бехIемцIуни имцIадикIули сари. Сен илкьяйда бетаруси?..
Буралли, 2025 ибил дуслизир Россияла регионти-ургар бегIлара дахъал гьундурачирти низам-кьяйда дулънила шайчирти анцIбукьуни нушала республикализир сари кадикибти. МВД -ла дурусти баянти хIясибли — 477 азир анцIбукь. Иличир имцIати Москвализир ва Москвала областьлизир сари. БегIлара камти Чукоткализир, Ненецкла округлизир ва Магаданна областьлизир.
Гьар жумягIлизир республикала гьундурачир кадикибти бе­хIем­цIунала лугIурбани адам уркIиули сай. Илдазиб алхунти им­цIа­ливан жагьилти ва ургарти гIямрула адамти саби, хIейгеси биалра, биштIатира. Сен илцадра адамтани чула жан ахIе­ра­хIе­ди­ру­ти?!
Сабабти лебтанилра далути сари: гьундурачиб къалабали башни, бяхIчиси гьунчи дурабухъни ва телефонтази хIербикIни. Ил анцIбукьлизиб бегIлара децIагеси саби машиналичибтани чула ва алавчартала гIямру селизилра хIедирни. Се сабабли адамти дурхъати, дахъал миллионти дедили асибти машинабачи кабиили башути, гьундурачирти низам-кьяйда дузахъес хIейгули биалли?! Сен цархIилталара гIямру урехилизи диркахъути? Илгъуна ихтияркIун чизибалра агара. БехIемцIунази бикибтикIун мицIирли кавлаллира даимлис чулахъуни бетарули кьалли, хаслира биштIати.
Гьундурачи даршибти видеоре­гист­ра­тортазиб чебиули саби рульличибти бахъалгъунти жагьилти телефонтази бархили биъни. Ихцадра къантIти адамла гIямру гьатIира къантIдирули саби илдигъунти авараагарти шофертани. Машиналичи кабирухIели адамтачиб чебси саби чула ва алавчартала гIямру мяхI­кам­дарес. Нушала Идбагли (с.гI.в.с.) хъар­бариб­сири нуша цаличил ца узби кьяйдали дира­хъес, чисалра хIейгахъу кьалли вегIла узис вай­си биубли. Пикридухъеная иличила…
Гьундурачир низам-кьяйда дузахъули, мяхIкамли диреная, хIу­ша­ла ва алавчартала гIямру ва арадеш хIушазирад дигниличила хъум­мартидая…

Наида Гъуруева