Ишди бурхIназир 47 дусла бухIнаб дураберкIибси бамсриагарси бузери ва дурхIначирти диги багьандан МяхIячкъала шагьарлизиб ВатIа игитунас хасбарили дураберкIибси балбуцличир Сайгибат ГIябдуллаева чебяхIси шабагъатличи – михъирличи биршуси «Дагъистан Республикала багьудила бетуцлизир хIурматла насихIятчи» ибси лишанничи лайикьрикиб.
Сайгибат ГIябдуллаевани сунела бузерила манзиллизиб чеалкIуси наслула гIяхIцад вакилти багьудичебтили ва бяркъчебтили халабаахъиб. Илини дурхIнас багьудлуми дедлугулицунра ахIи, илдазир багьудлумачи, ВатIайчи диги адикьур, чеалкIуси наслула вакилти патриот бяркъличи бикахъиб.
Илини бучIахъули калунти дурхIнани гIямрулизир лайикьти мерани дуцили сари ва чула педагогла насихIятуни хъумартурли ахIен.
Сайгибатлис ил бархIи мягIничебсили бетаурлири СВО-лизир бутIакьяндеш дируси ургъан Руслан ГIяхIмадхIяжиевла неш сарливанра. Пагьмучерси ва черетаибси педагогла уршили ишхIелла манзиллизиб ВатIа гьалабси чебла ламусличил таманбирули сай.
Илгъуна кьадричебси балбуцличи цалабикибтани Сайгибат ГIябдуллаевас уркIи-уркIилабадси баркалла багьахъур ва илисра илала кулпетлисра арадешра талихIра диубли, урши чедибдешра сархили, хIулкIули хъули чарухъи дигниличила багьахъур.
Дахадаевла районна администрацияла пресс-служба
