Ишди бурхIназир Ахъушала районна культурала управлениелизир халкьла пагьмуртала Юртла методистли рузуси Салимат Мусаадаевачил гьунираира.
Салимат ва илала гIямрула вархкья ХIяжимурад Мусаадаев культурала управлениелизиб бузес бехIбихьибти саби 2003-ибил дусличибад.
Салимат гьар шайчирад пагьмучерси хIянчизар сари, методистлира, культурала КIялгIялизир ва цархIилти мер-мусаличир детурхути шадлихъуначир ведущаялира рузули сари. Художественная самодеятельностьла хIянчизартачил дарх жагати делхъра дирули рирар. Жура-журала делхъаначи рурсби бурсибирули, постановкабира кадирхьули сари.
КъантIли буралли, культурала управлениела гIямрулизир Салиматли жавабкардешличил, черетаили, жигарла бутIакьяндеш дирули сари. Салиматли бутIакьяндеш хIедарили детурхути рахлилра шадлихъ, фестиваль, конкурс, байрам хIедургар. Илини барх бузутала ургаб халаси хIурмат сархили сари, районна шимала культурала хIянчизартачил тянишдеш дузахъес бала, халкьла-ургар жагали ралрикили рирар. Ахъушала шилизибси краеведческий музейличилра бархбас бузахъули саби Салимат ва ХIяжимурад Мусаадаевхъалани. Музейлизир детурхути далдуцуназир илдани мурталра бутIакьяндеш дирули бирар.
Салиматли районна ва Дагъиста духIнар детурхутазирцун ахIенну, Россияла цархIилти шагьуртазир дурадуркIути далдуцуназирра бутIакьяндеш дирули сари. Чегьурли миллатла палтарра, жагали, устадешличил делхъра диру, илкьяйдали ведущийла хIянчира бузахъу.
Салимат Мусаадаева ДР-ла культурала Министерствола, ДР-ла халкьла пагьмуртала Юртла, районна администрацияла, культурала управлениела шайзирад дахъал шабагъатуначи лайикьрикили сари.
Ахъушала культурала управлениелизиб леб бахъал пагьмучебти хIянчизарти, дахъал дусмазиб чули касибси санигIятлис марти, цархIилтас гIибратли бетаурти, чула санигIят дигути, иштяхIличил бузути, илдазирад ца сари Салимат Мусаадаева.
Илини сунела гIямрула вархкья ХIяжимурадличил кIел урши абикьур, гIяхIси бяркъра бедили, багьудира касахъили. Илдала урши Рабазай биалли гьанна мардешличил ва жавабкардешличил ВатIайс къуллукъбирули сай. Рабаза дявила частьла командирла шайзирад бегIтачи Баркаллала кагъурти дашули сари. КIиэсил урши СягIид школализив учIули левал. Чула бегIтигъунти духути, дяхI шалати дурхIни саби Салиматла.
Илдала хъулиб баракат, бузерилизир сархибдешуни имцIадикIаб!
С.ГIябдуллаева
