«Ахъушала район» МО-ла ад­ми­нист­рацияла бекI М.ГIяб­дул­каримовла каби­нет­ли­зиб СВО-лизиб бургъути урш­ба­ла бегIтачил гьунибаъни бетер­хурсири. Ил балбуцличир хIер­да­риб СВО-ла бу­тIа­кьянчибала хъа­­либаргунала че­лу­кьути суал­­ти, илдачил ихтилатбариб, се­гъуна кумек гIягIнилил хьар­баиб.
Районна бекI МяхIяч Кьадиевичли, илала заместительтани СВО-ла бутIа­кьянчибас, илдала хъалибаргунас сегъуна кумек гIягIнилил халаси пикри бяхI­чи­иули саби ва чебетаахъили кумекличил гIеббурцули саби. Гьунибаъни­личиб М.ГIяб­дул­каримов илдала дурутачи ле­­хIяхъиб ва гIяхIгъабза уршби абикьни­лис баркалла багьахъур. Сегъуна-биалра гIягI­­ни­деш дакIубухъалли, чучи дугьабилзахъес буриб.
Ил бархIи гьунибаъниличиб лебри Усишала шилизибадти, ВатIайс мардешличил къуллукъбирули, сунела жан ахIерахIедарили, СВО-ла анцI­бу­кьу­на­зив алхунси, гъабзадешла урши айкьурти, Кьурбанмя­хIяммадла бегIти Дауд ва Аминат ГIя­маровхъали. Илдани авал урши-рурси абикьур, гIяхI­си бяркъра бедили, халкьла хIур­мат­­бирахъес бурсибарили, гIямрула гьунчи дураиб.
Кьурбан­мя­хIям­мад Даудович РФ-ла Оборонала Ми­нис­терстволичил, вягIда бигьи, сай гIяхIъулали СВО-лизи арякьунсири. Амма вахъ­хIи­агарли ил гIяхIгъабза урши гIямрулизивад арякьун, Аллагьли Гьалжанала агьлу вараб сай.
Дауд ГIямаров акIубси сай Усишала шилизив. Илини хъалибарг абикьес багьандан, халаси бузери бариб декIар-декIарти хIянчурбачив узули. Ил узули калун хъарахълизив букIунни, гьанна биалли гехIел дус узули сай Ахъушала ва Лавашала районтала хутIла шалубала шайчивси управлениелизив хутI биршанни. Дауд ГIямаровли сунечи хъарси хIянчи жавабкардешличил, чебетаахъили даимбирули сай. Сунечи барх бузутала ва Усишала халкь-ургабра халаси хIурмат сархили сай илини.
Аллагьли илдас сабур бедаб чула анцIкьи чебарбукахъес.

С.ГIябдуллаева