Гьалавван, МяхIячкъалала депутатунала Собраниеличив, лебилра 45 депутатли цауркIли тIамри дедили, заманалис шагьарла бекIла къуллукъуни дузахъуси Жамбулат Шапиевич Салавов шагьарла бекIли викIиб.
Депутатунала гьалав гъайулхъули Жамбулат Салавовли шагьарлизир дарес чараагарти хIянчиличила, сунела пикрумачила ва кьасаначила буриб.
Илини дурибти пикридарибхIели, лерилра шагьарлизирти челукьути далагардешуначила ункъли балули виъни ва лерилра цIакьани кадихьили узес хIядурли виъни иргъули саби.
Жамбулат Салавов, заманалис шагьарла бекIла къуллукъуни дузахъули левай, бегIлара челукьути шагьарла масъулти ирзес вехIихьиб.
Лебилра шагьарла халкьли чебиули саби Имам Шамилла уличилси кьакьа, гьарли-марси шагьарла вегIливан, бетаруси тяхIярли, дахъал харжани хIедарили, гIяхIцад къулайбарили биъни. Ил цаибси ганз гIяхIси сягIятличиб биахъаб.
Ну хIеррируси хъа гьалабси нясдешуни кадирхьуси мерличир заб-маркахIели чярт детарутири. Ца баз гьалар, ила дурхъати сагати гъягъя хIехибну, урасибси гьунила, дибгIяндарибти къирра, гъягъяра какьурли тIинтIдариб.
Нушала юртла азбар-гIяя хьулчидан сагадарес ярга баайчи, барибси къулайдешли гIямал биру. Илкьяйда гьарли-марси хъа вегIван узули, харжикIули къулайбарес чебиркур нушала шагьар.
Сунела гъайлизиб Жамбулат Салавовли, 2026 ибил дуслизир сагати автобусуни дузес дехIдирхьниличилара бурили сай.
Депутатунала гьалар дурибти илала гъай пикридаралли, шагьарлизирти тяхIяр-кьяйдаличила мурхьли балули виъни, челукьути масъулти секьяйда ирзутил пикрибарили виъни иргъули саби. Сагаси шагьарла бекI Ж.Ш.Салавовлис гьарли-марли узес ва шагьарлантас къуллукъличи кайзес дигули сай.
Шагьарлантасра, гьариллис, шагьарлизиб чула хъулибван вяшбикIес чебиркур, гьар секIал пикрибирули ва ункъбирули.
ИлхIели нушала шагьар нушани пахрубаресили бетарар.
Муъминат Хаттаева
