Нестеровхъала на­саб­ла адамти Ахъушала ши­лизиб хIур­матличил пай­да­ла­би­кIути ва машгьурти са­би. Ил насаблизивадси сайри Нес­­терова Зумруд МяхIям­ма­дов­нала дудеш, неш ГIяйшатра Ахъушабадси минала, хIурматла хъалибарглизирадси сарри.
БегIтани Зумруд ва илала рузби адамтала хIур­матбирес балутили, бяркъчебтили абикьур.

Зумруд МяхIяммадовнани 1994 ибил дуслизиб гIяхIти кьиматуначил Ахъушала урга даражала цаибил школа таманбарибсири. Сунела бузерила гьуни бехI­бихьиб 1995 ибил дуслизиб Ахъушала культурала управлениела Централизованная библиотекализир художник-оформительла къуллукъличир рузули. Гьан­на илала бузерила стаж 30 дусличи абикили саби.

Зумрудли 2003-ибил дуслизиб МяхIяч­къа­ла­лизибси пачалихъла культурала ва искусствола колледж хъараахъур. Гьаннара илини сунечи хъарси чебетаахъили бекIбирули, бузерила гьуни даимбирули сари, библиотекализир халалгъуна методистли рузули. Зумруд сунечил барх бузутачил ралгунси сари.

Сари рузуси заманала рухI­нар ил чуйнара ХIурматла Грамотабачил шабагъатларариб. Дахъал дусмазиб хIялалси бузери барни багьандан, районна культура гьалабяхI арбукес, миллатла фольклор хъум­хIер­тахъес рузни багьандан халкьани-ургабси хьунул адамтала байрамла БархIиличил бархбасахъи, «Ахъушала район» МО-ла администрацияла шайзирад ХIурматла Грамоталичи лайикьрикиб. Профсоюзла шайчиб жигарли бутIакьяндеш дирули хIянчи бетурхахънилис «АрагIебли Россияла культурала хIянчизартала санигIят­лашалси Союз» бикIуси организацияла Председатель С.Н.Цыгановла шай­зирад ХIур­матла Грамоталичил шабагъатларарибсири.

Зумрудли сунела гIямрула вархкьячил хIябал урши-рурси абилкьули сари. Илдас гIяхIси бяркъ бедес, багьуди касахъес, гIям­ру­ла бархьси гьунчи дураэс къайгъилизиб саби илди кIелра.

Рурси – ГIяйшатли ишдус хIунтIена аттестатличил ва мургьила медальличил школа таманбариб ва Дагъиста пачалихъла медицинский университетлизи ручIес карерхур. «Лечебное дело» бикIуси санигIятличи регIриэс бажардилизир сари.
КIиэсил рурси ПатIимат 2-ибил класслизир ункъли ру­чIу­ли сари. Урши Муса авъибил класслизив, сунела рузбачибад гIибрат кайсули учIули сай. Учительтира гапбикIули саби илди рурсбачила.

Илдала хъалибарглис гIямру­лиз­ир ва бузерилизир гьарбизуни дулгулра!

С.ГIябдуллаева