ВатIан ва халкь балтахъули, гьужумлизи дурабухъунти жагьилти чебиухIели, илдала гъабзадешлис ва игитдешлис ахир агни гьарил баркьудилизиб якьинбирухIели, чараагарли Чедибдеш нушала бирниличи бирхаудира халаси умутра лер.

Дила макьалала игитра гIямрулис илцад-декIар халаси ахIен. Амма сунела камти гIямрулизив ил дявила къуллукъуни тамандирули, душмантас къаршидеш дирули, хъуцIарличи хъуцIари чебетаахъили бургъути бархкьябала ургаб халаси хIурматра, хъарбаркьуни заманаличир ва гьарбизурдешличил тамандирни багьандан, гIяхIцад шабагъатуначира лайикьикили сай.
ГIямаров ГIямар МяхIяммадович акIубси сай 1998 ибил дусла августла 20-личив. Илала бегIти Ахъушала районна Урхьулахъари шилизибадти саби.

Илини 2015 ибил дуслизиб Дербент шагьарла 17 ибил школализиб белчIуди хъараахъур. КIинайс белчIуди даимбариб Дагестански Огни шагьарлизибси СПТУ-лизиб. Багьудлумачи гъаргъси ГIямарли илра гIяхIти кьиматуначил таманбариб.

ГIярмиялизиб къуллукъбируси замана, илини сай гIяхIъулали 2021 ибил дуслизиб вягIда къулбасбарили, Россияла Ярагъладарибти ЦIакьаназиб къуллукъбарес, ВатIан балтахънила хIурматла санигIят чеббикIес пикрибариб.
ГIямарла гъабзадеш алкIукад хIилизир лерти сари викIалра, хатIа бетхIерар. СенахIенну ил ЧебяхIси ВатIа дергъла бутIакьянчи ГIямар ХIясановла уршила (рурсила) ур­шира сай. Итди къиянти дусмазиб, улкаличи балагь че­би­хьун­хIели, ил батахъес дурабухъунтала гьаларти къяяназив вагьаривиубси илала хала дудешла дявила асилси гьуни ишбархIи ГIямарлира даимбарили сай. БусягIятла замана илини СВО-лизир жигарла бутIакьяндеш дирули сай.

Гъабзадешличил дявила чебла ихъуси ГIямарла шабагъатунира лер. Илини къуллукъуни детурхахъуси хасси бригадалис буйрухъуни дедлугусила шайзибад уршила нешличи Баркаллала кагъарра бакIиб. Илаб бурули саби: «Дила бригадализиб дявила чебла таманбируси, гъабзадешчевси урши ГIямар айкьнилис халаси баркалла. ВатIан балтахъули, ил цаибти бурхIназивадал цархIилтазивад чихъти устадешличил, кадизахъурти тяхIяр-кьяйда чедетаахъили дузахъниличил, гьала тIашдатурти мурадуни заманаличир ихъниличил декIарулхъули сай. Иличибли бархкьябала ургаб хIурматра сархиб».

Гьарли-марли ГIямар ГIямаров сунечи хъарти хIянчи жаваб­кардешличил детурхахъниличи мурталра чекайзурси сай. Госпитальлизиб хIеруди бирухIели, илала мер-мусаличи кеп­­биуб­ти адамти адхIебацIахъес къайгъи дакIубарни багьанданра, коман­дованиела шайзивад ил Баркаллала кагъарличи лайикьи­киб. Илала илкьяйдали гIуррара шабагъатунира лер: «Кав­казлизир къуллукъуни тамандирни багьандан» бикIуси II-ибил даражала михъирличи биршуси лишан, «Дявила хасси балбуцла бутIакьянчис» бикIуси РФ-ла обо­ро­нала Министерствола медаль.

«Набчил барх дявила къуллукъуни тамандирули авал дарган би­­ри. Илдачил нуша замана-замана нешла мезли гъайди­кIу­ли­­ра дирехIери. Нуша лерилра дарх, узбиван хъарбар­кьуни таман­ди­рули, вяшдикIутири. Сен-биалра вегIла нешла мез­ли гъай­би­кIути лебхIели, уркIилисра гьамадли бири», — бурули са­би ГIямарли.

Нуни чуйнара бургъантазибад иргъули, дявила хасси ­бал­буц бетурхуси мерличиб чидил миллатла вакил саял хIер­хIеи­ли, лебилра барх, ца някъла тIулбиван, уржили, гьал­магъ­деш ду­за­хъули, чула къуллукъуни тамандирули, бур­гъули са­би. Бар­кал­ла биаб чус нушаб даршудеш сархес къайгъи­лизиб душмайчи гьужум­лизи каберхурти гIяхIгъубз­нас! ГIямар ГIяма­ров­гъунти жа­гьилти ВатIа асил уршби саби ну­шала челябкь­лара.

Салимат ГIялиева