Ахъушала урга даражала цаи­бил школализиб бучIу­ли калунти районна бухI­наб ба­хъал саби, чулира чебяхIси дара­жа­ла багьу­дира касили, тухтурла, педа­гог­ла, духIнарти къул­лу­къу­нала органтала хIянчизарла ва жура-жу­ра­ла санигIятуначил бегIбиубти адамти. Леб илди-ургаб машгьурти профес­сор­ти, гIил­мула кандидатуни, юристуни, тарих­чи­би, журналистуни, поэ­туни, писательти, ар­­хи­тек­торти, культ­у­рала урибси хIян­чи­зар­ла у сархибти ва цар­хIилтира.

Халкьлис манпагIятдиэсти санигIя­ту­начи бегIбиубли, хIялалси бузериличил ахъти къуллукъуначиб бузули, Дагъиста бухI­набцунра ахIи, дурала мераначиб, халкь-ургабра халаси хIурматра сархили хIер­бирули леб Ахъушала районнизибадти гIякьлучебти адамти.
Илгъуна баркьудилизи пай кабихьили саби ил школализиб бузули калунти, баркаллаличи лайикьбикибти педагогунани ва бусягIятра бузули лебти учительтани.

Илди-ургаб леб хIурматла уми касибти, халаси пагьмула бегIти педагогуни Майя ГIялиева, Шагьризат МяхIяммадова, Загьи­дат Будайчиева, СалихIят ХIусей­но­ва, ГIябидат МяхIяммадова, Хадижат Мя­хIяммадова, Карим ГIяббасов, Дауд­хIя­жи МяхIяммадов ва бахъал цархIил­тира.

ГIялиева Майя Айгубовнани нешла мезла ва литературала дурсри кадирхьули сари, чебяхIси даражала категорияла му­гIяллимра сари, ДР-ла багьудила отличникла, ДР-ла багьудила рурибси хIян­чизарла ва РФ-ла цахI­набси багьудила хIурматла хIян­чи­зарла умачира лайикьрикили сари.

ХIусейнова СалихIят Загьидовна биологияла дурсри кадирхьули рузусири, РФ-ла багьудила отличникра сари ва чебяхIси даражала категорияла мугIяллимра сари.

Будайчиева Загьидат Булатовнани урус мезла ва литературала дурсри кадирхьутири, РФ-ла багьудила хIурматла хIянчизарра сари, ДР-ла рурибси мугIяллимра сари, ДР-ла багьудила отличникла у сархибси ва чебяхIси категорияла мугIяллимла уличи лайикьрикибси сари.

ГIяббасов Карим НухIовли биологияла ва географияла дурсри кадирхьули сай, РФ-ла цахIнабси багьудила хIурматла хIянчизарла у сархиб, чебяхIси категорияла учительра сай.

МяхIяммадова Шагьризат ГIябдул­лаев­нани урус мезла ва литературала дурсри кадирхьутири. Илинира РФ-ла цахI­­­набси багьудила хIянчизарла у касибси сари ва чебяхIси даражала категорияли­чи лайикьрикибси сари.

МяхIяммадов ДаудхIяжи БяхIянд­гIя­лие­вич­ли физикала ва математикала дурсри кадирхьули узули сай. Илра ДР-ла багьудила отличникра сай, чебяхIси даражала категорияла учительла ура сархили сай.

МяхIяммадова ГIябидат ГIя­лихIя­жиев­на бехIбихьудла классунас дурсри кадирхьули рузули сари, илинира РФ-ла багьудила отличникла у сархили сари. МяхIяммадова Хадижат МяхIяммадовара бехIбихьудла классунас дурсри кадирхьули рузули сари, илра РФ-ла багьудила отличникла у сархибси ва чебяхIси категорияла мугIяллим сари.

Илди халаси багьудила бегIти, малхIям­ти, чучи хъарси хIянчи чебетаахъи­ли бекI­­б­ирути мугIяллимтани чула гIямру шк­о­лалис ва дурхIнас хасдарили сари. ДурхI­­нази багьуди касахъес, илдас гIяхIси бяркъ бедес, бархьси гIямрула гьунчи ду­раэс къайгъилизиб саби. Леб бамсриахъес арбякьунти мугIяллимтира. Илдани бу­­чIахъули калунти, школа таманбарили гIер­гъи дахъал дусми дикили диалра, чу­ла мугIяллимтачи гIяхIладли башули са­би. Иш­ди бурхIназибра, дила тухумти гIяхI­лад­ли бякьун, нушала учительница Шагьризат ГIябдуллаевначи.

Леб дебали пагьмучебти, дурхIначи дигичебти, дурхIнази багьуди касахъес къайгъичебти, малхIямти, чебетаили бузути, чули касибси санигIятличи балбикибти жагьил директор Сабият МяхIяммадова ва учительницаби: Рукьият АрслангIялиева, Зубалжат ва ПатIимат ГIялиевахъали, Зарема Лукьманова, Сабият ГIяйсамирзаева, Кумсият Булатова, СалихIят Ибрагьимкьадиева, Раисат Сулайбанова, Таибат Мя­хIям­мадова, Рукьият ва Загьидат Рабадановахъали, Фатима ГIябдуллаева ва ­бахъал цархIилтира.
СанигIятлашалси байрамличил мубаракбарес дигулра илди лебилра! Гьаннала гIергъира чула касибси санигIятлис марли, чула бузерилизир сархибдешуни им­цIадикIули бузес ва хIербиэс кьадарбиаб!

ГьанхIебушес хIейрар ил школализиб дахъал дусмазиб бузули калунти, Ахъушала шилизибти дурхIнази багьуди кайсахъули, гьарахъти мер-мусаличибад бакIибти, шила халкьла ургаб хIурмат сархибти, ба­хъал урусла учительницабира лебтири или, чулира белчIудила-бяркъла хIянчилис хьулчи кабихьибти.

Сабият ГIябдуллаев