ХIябибуллаева Рукьият Кьурбановна акIубси сари Ахъушала районна Усишала шилизир, хIурматла, гIядатла хъалибарглизир.
Усишала шилизибси урга даражала школализир гIяхIти кьиматуначил гехIел класс тамандарили, 1974 ибил дуслизир Рукьият ХIябибуллаева Избербаш шагьарлизибси педучилищелизи карерхурсири.
1978 ибил дуслизиб педучилище таманбарили, сунела шилизи чаррухъун ва Усишала урга даражала школализир бехIбихьудла классунас дурсри кадирхьули сунела бузерила гьуни бехIбихьиб.
ДурхIначи дигичерси, малхIямти хIял-тIабигIятла, гьарил секIайчи чекаризурси Рукьият Кьурбановнани бучIантази гIяхIси багьуди касахъес, илди бяркъчебтили халабаахъес къайгъилизир рузули, сунела гIямру школалис хасдарили сари. БехIбихьудла классуназиб саби дурхIнала багьудилис хьулчи кабирхьуси. Ил багьандан цаибси учительницала баркьуди, илала гIяхIдеш, яхI-ламус, багьудиличи диги акIахъес дирути къайгъни, гьарил адамла гIямрулизир хъумхIертурли муртлисалра кавлути сари.
Сунени касибси санигIятличи ралрикибси Рукьият Кьурбановна бусягIятра Усишала урга даражала кIиибил школализир рузули сари.
Ил шила халкьла, барх бузутала, сунени бучIахъути дурхIнала ва илдала бегIтала шайзибад баркаллаличи ва хIурматличи лайкьрикили сари.
Рукьият ХIябибуллаевани сунела гIямрула вархкьячил хIябал урши-рурси абикьур, гIяхIси бяркъра бедили, чебяхIси даражала багьудира касахъили, хъаллара барили, гIямрула гьунчи дураиб.
Рукьият Кьурбановнала бузерила стаж 46 дусличи абиркули саби. Ил чуйнара шабагъатуначи, ХIурматла Грамотабачи лайикьрикибси сари, илини цаибил категорияра касили сари.
Ишди бурхIназир МяхIячкъала шагьарлизиб учительтас хасбарибси совещаниеличир Россияла багьудлуми тIинтIдирнила Министерствола шайзирад «Багьудлуми тIинтIдирнила отличник» бикIуси лишанничил шабагъатларариб.
Гьаннала гIергъира сунела гIямрулизир ва бузерилизир сархибдешуни имцIадикIаб, шабагъатуни дахъдикIаб, сунела дигутани разирирули хIерриэс кьадарбиаб!
Иш белкI хIядурбирухIели баянти дучахъес кумекбиубти «Ахъушала район» МО-ла багьудила управлениела методкабинетла заведующая Наида ХIусейновас ва Усишала урга даражала кIиибил школала учительница Майя ЯхIъяевас баркалла багьахъес дигулра.
С.ГIябдуллаева
