Ахъушала урга даражала цаибил школализир бехIбихьудла классунала учительницали 36 дус рузули сари Ибрагьимкьадиева СалихIят ГIябдуллаевна.
Илини ил школализир гIяхIти кьиматуначил 8 класс делчIи, Буйнакъсклизибси педучилищелизи ручIес карерхурсири. Авал дус ручIули, ил таманбарили гIергъи, 1990 ибил дуслизир Ахъушала урга даражала школализир бехIбихьудла классунас дурсри кадирхьули рузес рехIрихьибсири.
СалихIят ГIябдуллаевнани «РФ-ла цахIнабси багьудила хIурматла хIянчизар» ибси у касиб, «Ахъушала район» МО-ла администрацияла, багьудила управлениела, школала дирекцияла шайзирад чумал ХIурматла Грамотабачи лайикьрикиб. Ил бузерила ветеран сари.
СалихIят ГIябдуллаевна сунени бучIахъути дурхIнази гIяхIси багьуди касахъес, илди бяркъчебтили халабаахъес къайгъиличил, жавабкардешличил рузули сари. Ил багьандан ил — бучIантас ва илдала бегIтас дигахъу. Сари рузуси коллективла, дурхIнала бегIтала ва шила халкьла ургаб халаси хIурмат сархили сари илини. СалихIятли школала гIямрулизир жигарла бутIакьяндеш диру.
— Гьанна дила авэсил виштIаси учIахъес СалихIят ГIябдуллаевначи вархьира, бахъ гIяхIил дурхIнази багьуди касахъес къайгъилизирси, илдачи дигичерси учительница сарни багьандан, – или буриб ца ручIанна нешли.
ГIурра халкьлизирад дакьира иличила гапъала.
СалихIятли сунела гIямрула вархкья ХIяжимурадличил хIябал урши-рурси абикьур. Илдас гIяхIси бяркъ бедиб, багьуди касахъиб.
— Рурсилизи чебяхIси даражала багьуди касахъес бетхIеур, жявли шери редира, гьанна илала хIябал биштIати леб, – буриб СалихIятли. Дила халасигъуна урши администрациялизибси архитектурала ва юртани лушнила отделлизив узули сай, кIиэсил автодорожный институтлизив заочно учIули сай.
СалихIятла неш Ахъушала шилизир бахъал адамтани ралуси сари, «сварщик ГIяйшат» бикIули, халаси хIурматла, духуси хьунул адам сари ил. СалихIятла дудеш жявли гIямрулизивад арякьунсири, ил багьандан илдала нешли халаси къайгъи дакIубарили дурхIни бяркъчебтили, духутили абикьур.
СалихIят Ибрагьимкьадиевас къаркъаван чIумаси арадеш, бузерилизир сархибдешуни ва гьарбизуни, хъулиб баракат дулгулра!
С. ГIябдуллаева
