Октябрьла 5-личиб мугIяллимла БархIи саби. Иличил бархбасахъи, наб дила цаибси учительницачила белкIес хьулрухъунра.
Ну Сергокъалала районна ГIяймаумахьила урга даражала школализир ручIули калунсира. Илаб бахъал хIебиалра, амма дебали саберхурти, мурхьти багьудлумачилти, чула санигIят ункъли балути, пергер мугIяллимти бузули саби. Илдазирад ца сари дила цаибси учительница ГIялиева Умукурсум Сулайбановна сари.
Нуни пахрубирулра наб илини цаибти классуназир багьудлуми ва бяркъ гибниличи, сенахIенну ил гьар секIайчи черетаибси, дурхIнази секIал багьахъес къайгъичерси сархIели. ГIяхIси, духуси мугIяллимла дурсрира, гьайгьайрагу, лебтасалра дигестили дирар. Ил багьандан нушабра дебали дигахъахIери дурсрачи дашес, нушала мугIяллимли буруси гьарил дев гIебасес къайгъилизир дирехIери. Иличи че, мугIяллимли нушани материал жявли гIебасесли ва ункъли багьесли гьарил секIал дебали жагали гIеббурули бири.
ЦархIилти дурхIниван, нура дила цаибси учительницани дучIахъес ва лукIахъес бурсидарира. Эгер дила селра бетхIерули биалри, илини мурталра кумекбири, хIебалуси секIал багьахъес гьачам-гьатIи баянбири.
Гьайгьайрагу, хIушаб лебтасалра гьанбикес асубирар илдигъунти хIянчи сари цархIилти мугIяллимтанира дирути или. Амма Умукурсум Сулайбановнани ну ва набчил барх бучIути дурхIни белчIудиличи хасти ахIенти бетуцуначира, секIайчира бурсидарира: адамла чихъти къиликъуначи. Илини гьариллизир адаб-хIяяла, адамдешла, уркIила малхIямдешла, уркIецIичебдешла къиликъуни диэс, мурталра цархIилтас кумекбарес хIядурли виэс гIягIнили биъни баянбирусири. Шуибил классличи адаайчи, нушази вайра-гIяхIра дагьахъес халаси къайгъи бариб Умукурсум Сулайбановнани.
Наб халаси баркалла багьахъес дигулра дила цаибси мугIяллимлис, нуша илдигъунтили адикьнилис! Дигулра ил сунела санигIятлашалси байрамличил мубаракрарес ва гьамадли ахIенси бузерилизир сархибдешуни далгес!
Умукурсум Сулайбановна, хIед чIумаси арадешра, гIямрула шалати бурхIнира дулгулра. Багьудлумачи гъаргъти, секIал багьес дигути бучIантира бархIиличи-бархIи имцIабикIаб!
