Ишди бурхIназир гIямрулизирад шалгIеррухъун машгьурси филолог, филологияла гIилмуртала доктор, профессор Аза ГIялибековна Тахо-Годи.
Ил 102 дус риублири.
Аза Тахо-Години 1958 ибил дуслизиб докторла диссертация ункъли бетерхахъурсири, ва 1959 ибил дусличирад ил МГУ-ла филологический факультетла классическая филологияла кафедрализир рузусири. 1962 ибил дусличирад ил баягъи кафедрала заведующийли рузусири, 1996 ибил дусличирад биалли – кафедрала профессорли.
А.Тахо-Годи «РАН-ла дунъяла культурала тарих» бикIуси гIилмула советла член рирусири. Илини гIилмула 800-цад хIянчи, учебникуни ва 300-цад макьала делкIун.
Машгьурси филологла сипта хIясибли, «А.Ф.Лосевла юрт» бикIуси урусла культурала ва философияла тарихла пачалихъла библиотека абхьибсири. Ил учреждениелис хьулчили диуб Аза Тахо-Години дедибти, философла 10 азир томлизирад цаладикибти жузи.
Аза Тахо-Годичила, античная литературала ва философияла шайчирси машгьурси специалист, тилмаж ва хIялумцIан сарливан, арагIебли дунъяличирра хабардерхуртири. Амма илала гIямрула бекIлибиубси баркьудили бетаур урусла чевяхIси философ Алексей Лосевла букьур мяхIкамли бихIни ва тIинтIбарни. Ил илала марси юлдаш, гIямрула рархкья ва рухIлашалси букьур сарри, суненира пасихIкарла хIянчи кадирхънилис ва архивтала черкад рузнилис сунела лерилра гIямру харждарибси.
Аза Тахо-Годи гIямрулизирад шалгIеррухъниличил бархбасахъи, илала гъамтази ва узи-уршилизи пашмандеш балахъулра. Машгьурси филологла шаласи сипат нушала уркIбазиб даимлис кавлан.
«Замана»-ла агьлу
