Хабар гьарахълабад бехIбирхьулра. Арбякьунси даршдусла 70-80-ибти дусмазиб, дуцIрумлизиб КьярбачIимахьила ургуба дебали сабухъчебси бирусири. Илар тIашкайзурси адам чехIеэсли дерхъили дакIибти сусул-анкIила хъуми, ранг-рангла вава-кьарла алпила сагни дирутири.
Хабарлизир гъай кьярбукIлантала цIедешличила – гIябачила сари. Илди биалли, сусул-анкIила хъумазир, хъалта-кьарван дерхъили дашутири. Нуша илдас «гIукIи» дикIехIе. ГIяби дирар дуцIрум дехIдирхьухIели арцIила, янила ахирлизир — хъула.
Илди гIябани, чула лебилра тарихлизиб, гьачамцун ахIи, шанти гашазибад берцахъибтири, сенахIенну илди хъалта-кьарван дашутири, сеналра агардарес вируси ахIенри. БугIярдешлизирад уруххIекIути, деркес бизити, хIеделхьи, сари дакIибтиван деркесра, делхьесра вирути сари. 20 градусла бугIярдешлизир, ванзализир илди хIедяргIили кавлули дирар.
Ну риштIахIели, дуцIрумла замана, лебил шантала хьунул адамти хъумачи арцIи дирцIес башутири. Хъу хIеберцIили баталри, гIяби дахъ дерхъили дашули, сусул дакIахъес далтути ахIенри.
Гьайгьайрагу, илхIели хьунул адамтани, бригадирли чехIебаэсли, гIяби адилтIуси гъуцгъуна тIерхьа барх кайсусири. ХIянчила бархIи каберхайчи, арцIи-кьарла махра барили, гIябала таврара бицIес вирусири. Ниълизибад бурт декIарбируси машинализиб бакIахъибси буртра, делхьунти гIябира гIур чинабалра агарси бизидеш саби. Нуша диштIахIели илди делкъи гIеладухъесцад дирутири. Сепайда, гьаннала замана аги барсбиубли саби. КьярбукIла сусул-анкIила хъуми арцIи-кьарли, занзбани дакIибти сагни детаурли сари. Дай дуцIрумлизир мура удули сари, вава-кьарла гIямру дайдирхъули. ИрцIули, укъули, дукули адерхахъес хIейрути гIяби, гьанна чинаралра агара.
Шила школала биолог, ПатIимат МяхIяммадовнани, гIяби детхIехъахъес багьандан, удалтути картошкала мякьлаб, гIяхIцад ванзала бутIаличир гIебшни гIябала гье дегIи сари.
Картошка удалтуси замана, челяркьути гIябала дахъал хъими чедаили, разириубли сари, дирар наб гIяби или. БархIиахъайчи картошка укъули рамсурли, ПатIиматли гIяби гIелабил бархIи адитIесли бариб. Буркъили таманхIебиубли камсигъуна картошкара калири.
ГIергъила бархIи ракIили хIеррикIалли, гIябала я хъими, я мякьи чинаралра агара.
— Гьуя шанти, иш се гIяламата, чи хъулки вируси дила гIяби дигIес вакIибси, илгъуна хIянчи барили, набчиб дукаркIули бургар ишди, — рикIули рачарархили сари. ГIур ункъливан хIерризалли, ил адамтала хIянчи ахIи, авкьяшан хъулкила хIянчи биъниличи шакрикили сари. Багьурли сари, гIяби дугелибугли дерги диънира. Ил кьалли биолог сари.
Ил хабар бурухIели нуша дирххIеурра, кIикьяшан дугелибугли дурги, гIяби ардухибти дикIутири. Чина хабара?
ДуцIрумлизиб дубуртази шадиб бякьунти дурхIнази ПатIимат МяхIяммадовнани дугелибугла пукьа чебаахъиб. Хабар марси биънилис бикьриван, дугелибугла пукьала сурат хIушабра бурхьулра.
КьярбачIимахьиланти дугелибуглис тIуж бикIар. «ТIужла мургIялла сани» бикIути мер-мусара лер шиличирад гьарахъли ахIи.
Илкьяйда дугелибугли дергун бегIлара гIергъити гIяби, гьанна, удатурти картошка халадаайчи хIерли кабиили бургар ил дугелибуг.
Муъминат Хаттаева
