Ахъушала урга даражала С.М.Кировла уличилси цаибил школализиб бахъал пагьмучебти, гIяхIти кьиматуначил бучIути, олимпиадабазир ва конкурсуназир бутIакьяндеш дирути бучIанти леб. Илдазирад ца сари 10-ибил «б» класслизир ручIуси МяхIяммадова ПатIимат МяхIяммадовна. ПатIиматли школала гIямрулизир жигарла бутIакьяндеш дирули рирар: районна духIнар детурхути конкурсуназир, олимпиадабазир бутIакьяндеш дирули, гьаларти мерани кайсули сари.
Ишди бурхIназиб Ахъушала культурала КIялгIялизиб бетерхурси «Успех» бикIуси пагьмучебти дурхIнас хасбарибси фестивальличирра ПатIимат чумал Грамоталичил ва Дипломличил шабагъатларариб.
Дагъистан Республикала багьудила ва гIилмула Министерствола шайзирад ПатIимат МяхIяммадова республикала кьадрила 2024-2025-ибил белчIудила дуслизиб бетерхурси, мерла ва миллатла (нешла) мезла шайчибси олимпиадаличир призер ретаънилис Дипломличи лайикьрикиб.
Ил «Ахъушала район» МО-ла администрацияла ва багьудила управлениела шайзирадра ХIурматла Грамотабачил ва савгъатличил шабагъатларариб.
ПатIимат МяхIяммадовала нешла мезла учительница ГIялиева Мая Айгумовна сари.
Гьаннала гIергъира ПатIиматлис гIяхIти кьиматуначил белчIудира даимбарили, чебяхIси даражала багьудира касили, гIяхIси санигIятличилра регIриэс кьадарбиаб!

С.ГIябдуллаева