Зугьумовхъала  Ахъушала шилизиб машгьурси хъалибарг саби, чулира халкь-ургаб халаси хIурмат сархибси.
Тухтур Зугьум Зугьумов акIубси сай 1942 ибил дуслизив Ахъушала шилизив хIурматла, хъалибарглизив.
Ахъушала урга даражала школа таманбарили гIергъи, З.Зугьумов керхурсири Дагъиста медицинала институтлизи. 1966 ибил дуслизиб гIяхIти кьиматуначил институт таманбарили, Ахъушала районна бекIлибиубсигъуна больницализиб бузерила гьуни бехIбихьиб.
З.Зугьумов ил больницализив жура-журала къуллукъуначив узули калун: бекI тухтурли, бекI тухтурла замести­тельли, «МАКС» АО бикIуси ме­ди­ци­нала страхованиела Фондла филиалла мерличибси отделениела­ начальникли.
Сунени касибси санигIятличи валикибси, малхIямси, духуси, масхара балуси, сунечил барх бузутачил цавалгунси, дигичевси, хIянчизартала ургаб хIурмат сархибси, зягIиптачи уркIецIичевси Зугьум Зугьумов гIяхIси тухтур сай.
Больницала административный  къуллукъуначив ил  узухIелира, тухтурла хIянчира илини бузахъусири, сурс кьакьарла тухтурла кумекличи хIяжатси адам хIеруди агарли валтуси ахIенри.
БусягIятра Зугьум МяхIяммадович узули сай ЦРБ-ла отделениела заведующийли, илала бузерила стаж 59 дус­личи абикили саби. Дахъал дусмазиб хIя­лалси хIян­чи барибси З.Зугьумов гIяхI­­цад хIурматла ша­­­багъатуначи лайикь­ви­кили сай: «ДР-ла хIур­матла тухтур», «СССР-ла арадеш мяхI­кам­­бирнила шайчивси от­личник»,  «СССР-ла уму­­деш бирни­ла оборо­нала отличник», «Арадеш бихIнила шайчивси чебяхIси категорияла тухтур» ибти ва гIуррара дахъал цар­хIил­тира хIур­матла умачи.
Зугьум МяхIям­ма­довичли сунела гIям­рула рархкья ПатIимат Мя­хIям­ма­довначил барх 57 дус дигиличил, мардешличил ва хIур­матличил, хIялалли гIямру деркIили сари. Илдани авал урши-рурси абикьур, гIяхIси бяркъра бедили, багьудира касахъили, халкьла хIурматбирахъес бурсибарили, гIямрула гьунчи дураиб. Гьанна леб дурхIнала дурхIнира, илдачибад акIубтира. Илдира адабдешчебтили ха­лабаахъес ва бархьси бяркъ бедес къайгъилизиб саби Зугьум ва Па­тIимат. Илдала МяхIмудла урши Шамил  районна жагьилтала Центрлис бекI­деш дирули узули сай.
ПатIимат МяхIяммадовнара Ахъушала районнизир бахъал дурхIнала хъалибарглизир акIубси сари.
Шилизибси урга даражала школализир гехIел класс тамандарили гIергъи, ПатIимат Буйнакъск шагьарлизибси педучилищелизи карерхурсири. ПатIимат МяхIяммадовнани 1968 ибил дуслизиб бузерила гьуни бехIбихьиб. Гьанна бусягIятра ПатIимат МяхIяммадовнани мугIяллимла хIянчи бузахъули саби ва бехIбихьудла классуназир дурсри кадирхьули сари. ДурхIначи дигичерси ва санигIятлис марси учительница сари.
Дахъал дусмазиб хIялалси хIян­чи барни багьандан, ПатIимат МяхIям­мадовна дахъал шабагъатуначи лайикьрикибси сари. Илди-ургар лер: «Бузерила асилдеш багьандан», «ДР-ла гьаларти сархибдешуни багьандан» бикIути медальтира, «ХIурматла учитель» бикIуси ура ва гIурра дахъал цархIилти шабагъатунира. Гьаннала гIер­гъира сархибдешуни имцIадикIули, арали ва разили гIямру деркIес кьадарбиаб ил­дас!
Илдигъунти, цалис цали мардеш дихIути, дигиличил, хIялалли хIердирути хъалибаргуни цархIилтас гIибратли детарули сари.

(Арбякьунси номерлизиб технический тяхIярла хатIа бетаурли, иш макьалализиб цархIил хъалибаргла сурат арбякьи саби. Ил багьандан иш номерлизиб нушани макьала сагадан гьалабирхьулра).

С.ГIябдуллаева