Июньна 18-личиб урус учительницала хIурматлис тIашбатурси памятникла мер-мусаличиб МяхIячкъалала музейлизиб «ХIХ ибил даршдусла ахирлизиб ва ХХ-ибил даршдусла бехIбихьудлизиб почтала открыткабазиб Дагъистан» бикIуси гьарли-марти суратунала ва документунала выставка абхьиб.
Илар 100-150 дус гьалар касибти суратуначилти 140 почтала открытка, документуни, итхIелила жузазирад, «Кавказ» бикIуси газетализирад касибти бутIни выставкаличи бакIибтас чедаахъес гьаладихьили сари.
Выставка ибхьули ГБУ «П.С. ХIямзатовала уличилси Дагъиста музей»-ла директор С.Р.ХIямзатова ва тарихла гIилмуртала доктор, профессор Э.М.ТIалхIят гъайбухъун.
100-150 дус гьалаб, саби лебсигъуна Дагъистан суратуназиб чебаэс тамашабизеслири. Наб тамашабизур даргала ши сабливан, 1904-ибил дуслизибси Кубачила ши. Суратлизиб илис шагьар или белкIи саби. Дила пикри битIакIиб 1904-ибил дуслизибси Дагъиста тах шагьар Темирхан-Шуралира. Иларти юртанала хъулчри итхIелил мегьли кIапIдарили дуили сари.
Нушала тарихличил бархбасунси суратунала выставка абхьни мягIничебси балбуц саби. ЧеалкIуси наслули тарихлизибси Дагъистан выставкаличиб чула хIулбани чебаэс бирули саби.

Муъминат Хаттаева