Лерилра чархла биркIантазир хIи рурхъуси адам чи сая? Иличила шакикес, дила пикрили, къиянси ахIен. Ил сай жагьилси адам. Жагьси адам — сай-алавти секIал хIясибхIедируси, заклизибси лагьаван гьаваличив азадли урцуси, зурхIябла ранганиван гьар шайчивад ухуси, виштIаси дурхIялаван бекIлизиб гIякьлу агарси. Гьарилла биубси саби ил манзил. Гьариллис гьанбиркур бугIярси аргълизив сай хIергIули, дахъал хIянчилизи ахъили, дугели гьанкI хIебашули, лебил халкьла ургав набчивра жагаси агара викIухIели. Вирхаэс къиянни бирар нуни гьанбушибси тяхIярли хIерхIейруси жагьилси адам левси сай или буралли. ЦацабехIтала гьанна саби ил манзил вавалибирхъуси, цархIилтани ил беркIили саби, хIябэстас – беркIес чевкъар. Дила пикрили жагьдеш адамла гIямрулизиб бегIлара кьадричебси, жагаси манзил саби, сенахIенну жагьхIелила гIямру кункли деркIили виалли, ухънакаибхIели челукьути секIал камли дирар. Рахли кьяркьти шуртIразир деркIили диалли, ухънаваибхIели илди лерилра чархлизирад дурадулхъес дехIдирхьур. Ил багьандан жагьил адамли сунела арадеш мяхIкамбирес гIягIниси саби, берк-бержличи пикри бяхIчииэс, декIси секIал ахъхIебурцес, ункъли вегIирес, вайти баркьудлумази гъудурхIейэс. Жагьси замана вайсира гIяхIсира декIарбарес, хатIахIейкес дебали къиянни бирар. Ил замана жагьилтази бархьли ахIен или буралли, иличил кьабулбиркутира камли бирар. Илдигъунти сари жагьилтала хIял-тIабигIят.
Сен ишар нуша жагьилтачила имцIали гъайдикIутира? СенахIенну июньна 27-личиб илдас хасбарибси байрам саби. Ил байрамла тарих СССР-лизиб 1958 ибси дусличибад бехIбихьибси саби. Илаб Верховный Советла Президиумли Совет хIукуматла жагьилтала БархIи («День советской молодежи») кабизахъурсири. КIинайс, Б.Ельцинни 1993 ибил дуслизиб, жагьилтала байрам дурабуркIес ибси ХIукму кьабулбарибсири. Илди дусмачибадли бехIбихьили, лебил дунъяла халкьли июньна 27-личиб жагьилтас хасбарибси байрам дурабуркIуси саби. Байрамличир дирар далуйти, делхъани декIар-декIарти хIязани. Жагьилтала разидешла бархIи саби ил. Улкала хъи саби жагьилти, илдазибад саби челябкьла дигахъуси. ИмцIабикIаб, цIакьбикIаб улкала хъи. Берхъаб ва бургьаб улкала жагьилти.
Анжела Мутазова
