ХажгIябдуллаева ПатIимат СултIановна ручIули сари Усишала урга даражала кIиибил школала 10-ибил класслизир.

ПатIиматли школала гIямрулизир жигарла бутIакьяндеш дирули сари. Ил ункъли ручIули сари. ПатIиматла халаси иштяхI леб тарихла ва жамигIятла шайчир, илдачила баянти дагьес, белкIани дучIес. Илала челябкьлализир юристла санигIятличи регIриэс кьас саби. ПатIиматли районна кьадрила жура-журала конкурсуназир бутIакьяндеш дирули рирар.

Илкьяйдали, «Дети против террора» бикIуси районна бухIнаб бетурхуси, терроризмаличи къаршидеш дируси БархIилис хасбарибси, дурхIнала суратунала шайчибси конкурсла лауреат ретаурли, жагьилтала политикала ва спортла управлениела шайзирад Дипломличира Грамоталичира лайикьрикиб, – Ахъушала районна саби гIяхIъулатала хIяракатла бузерилизи халаси пай кабирхьнилис, жагьилтала ургар гIяхIти пикруми, проектуни детерхахъес кумекбирнилис.

Гьалабван Ахъушала районнизиб лебил Россияла гIилмуртала-практикала «Нушани челябкьла алкIахъулра. Россияла тарихлашалти устадешла ва дявила урехиагарти сагати масъулти» бикIуси ЧебяхIси ВатIа дергълизиб Чедибдеш сархибхIейчирад 80 дус дикнилис хасбарибси мажлис бетерхурсири. ПатIиматли илизир жигарла бутIакьяндеш дарни багьандан Жамалутдинов ХIяжи ГIялиевичла Фондла шайзирад Баркаллала кагъарличил шабагъатларариб.

Гьаннала гIергъира ПатIимат, гIяхIти кьиматуначил школара таманбарили, ВУЗ-лизиб белчIудира даимбарили, сунес дигусигъуна, халкьлис манпагIятси санигIятличи регIриаб, игъбарла челябкьлара биаб!

С.ГIябдуллаева