2022 ибил дуслизиб ГIяхIмадхан Абу-Бакарла гIямруличила ва творчестволичила жуз дарабухъунсири.
А.Абу-Бакарла цацадехIти диштIати произведениеби, илала гIямрулизирадти баянти, писательла юлдашунала ва ил валутала гьанбикуни жузлизи кадерхуртири.
«Дарганти» бикIуси проектлизиб цаибси Дагъиста халкьла писательла 90 дусла юбилейлис ил жуз балкьаахъес «Дагъиста тарихла ва культурала рухIла давла» бикIуси жамигIятла организациялис бекIдеш дируси Перзият Кьурбановна БяхIяндовани халаси къайгъи барибсири.
Илала тилади хIясибли, нунира ил жузлизи каберхахъес багьандан ГIяхIмадхан Абу-Бакарла виштIахIелла гIямруличила макьала белкIунсири. Жузлизи кадерхахъес кIел дарган писательла ГIяхIмадхайчила гьанбикунира нуни урус мезличи шурдатурра.
Нушала тах шагьарлизибси «Лотос» издательстволизиб ил жуз дуракаиб. Жузличил бучIанти тянишбаресра гIягIнилири. Гьанбиркур наб: Перзият БахIяндовани ил балбуцра жагали дураберкIиб.
Балбуцличив гъайухъахъес набзира гъай гибниличи ну дебали разиикира, сенкIун нуни дебали гIяхIил балуси саби Абу-Бакарла творчество. Илала чеди ну гIямрулизивра ГIяхIмадхайчил къаршивиркули вираси, Дагъиста писательтала Союзлизи дила шан Сулайбан Рабадановличи гьаввикIухIели. Иличив гIяхIцадла виштIаси виасра, ну ГIяхIмадхайчил кIина шадлихъличивра къаршиикибсира. Гьаланачив «Лезгинка» рестораннизив (Нуни иличила дила «Илини илди дигIунти сари» бикIуси масхарала хабарлизибра гьанбушибси саби).
Арбякьунси даршдусла 80 ибти дусмазиб бетаурси анцIбукьличила саби нуни ил хабарлизиб буруси. Хабарла бухIнабуц иш макьалализибра лебкулра. Африкала ца улкализивад хъули шадив вакIибси дила гъамси юлдаш журналист Арсен Гъаниевра нура МяхIячкъалала Буйнакъскийла уличилси кьакьакад къунздикIулри. Дагъиста писательтала Созла къапуличи даибхIели, «Ваши гьари, хIела юлдашуни-писательти нушани «Лезгинка» рестораннизи аркехIе», — викIар Арсен.
Поэтунала-писательтала кьукьяра нушара рестораннизи дякьунра. ГIяхIси хIурмат барибсири илаб юлдашли нушала: даарицад держестира деркестира нушала столличир лерри. БегIлара шадлихъ бемжурси замана, Сулайбан Рабаданов, набчи ласвяхъили, викIар: «Столличирти лигIматунас дедес хIела юлдашла арц даисара?». Нуни Сулайбай бурибси мякьла кайибси Арсейзи бурира. Илини, селра хIеили, столлиуб тIашси дипломат сунела кьукьубачи кабихьиб ва гьаргбариб. Дипломат бицIибти банкла бергарагуназирти арц чедаили, уркIухъунси Сулайбан набчи хIеризур ва викIар: «Адамла ишдицад арц диэс хIедирар. Ишини илди дигIунти сари. Ваши ишарад дубшехIе!»
Нуша рестораннизи ляркьухIели, дила юлдашла някъбазиб биштIаси дипломат чебаибси Амир-Гъази викIар: «Жагаси чемодан леб кьалли, Арсен». ГIяхIмадхан Абу-Бакарли илини бурибси балбарибсири: «Иш чемодан ахIенну, Арсе арцла киса саби». Ил вархьсилира увухъун.
КIинайс, гIяхIцад замана арбякьунхIели, ну ГIяхIмадхайчил Мажалисла чедив, нуша районнизи дашуси гьунила дублабси ГIялихIяжила гIинизла мякьлав, къаршиикибсири. Дила юлдашунира нура, дяргIибти шинна бержес пикрили, ил гIиниз лебихIи хьурадиубра. Илаб, гIинизла мякьлаб, берк-бержлизи бархили, бамсриихъути ГIяхIмадхан ва илала юлдашуни баргибтири. ГIяхIмадхай ну вагьурра ва нушара чула къушумлизи жидарира. Нушала берк-бержра ил къушумлизи кабихьира ва шадлихъ даимбарира. Ил дила ГIяхIмадхайчилси бегIлара гIергъиси гьунибаъни сабри.
Балбуцличиб бахъал ГIяхIмадхан валути гъайбухъун. ЦацабехIтани, камти гъай дарили, писательличила сагати мягIничерти баянти дурулри, итдилтани биалли, дацI дугьби сарри дурути. Жуз дураэс халаси хIянчи барибси Перзият Кьурбановнас баркаллала дугьби дурес чилилра хъумхIертур.
Гъайухъес набчира ярга баиб. Нуни ГIяхIмадхан Абу-Бакарла жузи дурадухъунмадан дучIутири. Литературала программализир агаркъира, нуни урусла литературала дурсрачир ГIяхIмадха произведениеби гьандуршули вираси. Наб гьанбикиб бургар итхIели, балбуцличиб гъайбухъунти адамти ГIяхIмадха творчестволичила камли гъайбикIули или ва ил багьандан…
Гьаланачиб нуни къантIли бурира жузлизи каберхахъурси дила макьалаличила, сегъуна учIан вирусирил виштIаси урши ГIяхIмадхан Кубачила ва Уркарахъла школабазив.
Писательла «ЦIуба сайгак» бикIуси повестьличила ну гъайикIухIели, заллизи кабиибтала хъутри дикьесдииб. Хъутрачи разивикибси ну, «Вяй, нуни дурути ишдас гIяхIдилзулигу» викIули вииши, писательла «ДяхIила адамти» повестьличила гъайикIесра вехIихьира. Хъутри имцIадиуб. «Гьари, ца-чумал дев «Даргала рурсбачилара» дурис» ибси пикрира бакIиб бургар ну, гIянцIала, бекIлизи. Хъутрала тIама гьатIира ахъдиуб. Чуйнара ахъли «Регламент!» бикIутала тIамара бакьира.
ИлхIели ну селис хъатбикIутил шакикира. УркIи-уркIилабад бурасли, наб дебали децIагиб…
Амма заллизибти адамтачи гIяйибта хIеркьус: илди балбуцла ахирличир чедиахъути концертла номертачи хIерлири. ИлхIейчивад вехIихьили, нуни гIур далдуцуначив чинавалра гъайхIейкIес хъябарибси саби.
ХIяжимурад Ражабов
