ГIергъиси замана шимала жагьилти спортлизи ахъахъести шуртIри алкIахъни гIядатли бетаурли саби. Дахадаевла районна Хуршнила шантанира илгъуна гIяхIбаркь дураберкIес пикрибариб. Илкьяйдали лебилра шанти цалабикили, жагьилти волейболла хIязли биркьахъес майдан балкьаахъес или, фонд акIахъес багьандан 400000 къуруш арцла дучиб.
Хуршлантани майдан барес гъягъяра гъумра хили, 300 квадратный метрла чIябар бетонни кабуцили саби. Илди хIянчи дурадеркIес багьандан хасси машина (бетономешалка) тIалаббарибсири. Иличирли хIянчи гIяхIцадла кункдиуб. Шилизиб ва дурала мер-мусаличиб хIербирути хуршлантани илкьяйдали майдан балкьарахънила хIянчи гIеббуциб ва цахIнарти цIакьаначил бузери къелгIеббикес вирни якьинбариб.
ХIянчи дураберкIахъес имканбакIибсири физкультурала ва спортла управлениела начальник ГIябдуллагь Каримовла къайгъначил. Илини спонсор сайливанра гIяхIси кумек гIеббаахъиб. ЦахIнабси баркьудилизи кабихьибси пай багьандан илис хуршлантани баркаллара багьахъурсири.
Волейболла майдан кIантIити резинна хасти гIягIниахълумачил кIапIбарес пикрибарили саби хуршлантани. Иличибли биштIатачибадли бехIбихьили, халатачи бикайчи волейболла хIязлизи ихъутас гIяхIти шуртIри алкIахъули сари.
Хуршнила шила бекI ГIялибег Кьурбановли ил багаласи баркьудилизир бутIакьяндеш дарибтас уркIи-уркIилабадси баркалла балахъули сай: «Нушаницун, кумек агарли, илкьяйдали хIянчи дурадеркIес имканхIебикIи. Уржили цахIнабси баркьудилизи ахъибхIели сари сархибдешунира диахъес имканти алкIути. Ну пахрули вицIира нушала шилизиб илдигъунти къайгъичебти адамти лебниличи.
Шилизиб волейболла майдан лебни, спортла хIязанази ихъуси мер балкьаахъницун ахIи, вегIла ши гьалабяхI башахънилизи адамтани белгиси пай кабирхьнира саби. Гьаннала гIергъира шантани гIяхIцад сархибдешуни дирахъниличи вирхес вирар».
Школала директор ХIясан ГIябдусаламовли ил проектла мягIничебдешличила баянти гьаладирхьули сай: «Волейболла майдан балкьаахъни нушала шилизибти биштIатала ва жагьилтала спорт гьалабяхI башахънилис гьаликIли бетарар. Ил мер нушала дурхIни спортлизи ахъести шуртIрачилси мерлицун бетаурли ахIен. Илаб илди балгунтили ва командализиб бузес балутили халабикIар».
Дахадаевла районна адмимнистрацияла пресс-служба
