ГIергъиси замана дебали халаси пикри бяхIчииули саби чеалкIуси наслулис патриот бяркъ бедлугнила масъалаличи. БурахIелли, ил мурталра аргъбаибсили бетарусири, амма гьанна бусягIят, дунъяличирти ибкьти аги-кьяйдализир хIердирути нушаб ил гьатIира мягIничебсили бетарули саби.

СенахIенну, къиян дакIибхIели, улкала хъарихъли бетарути саби илаб хIербирути адамти. Жагьилтани саригу чула цIакь, гIякьлу-дагьри ил шайчир жигарчерли паайдаладирути. Ил багьандан, мекелли чараагарсили бетарули саби – дурхIни ВатIайчи дигичебтили абикьни. Диги агара диалли – ВатIайчи уркIира хIейзур.

Нуша дурхIни дирухIели, бегIтани ва цаибси учительницани «Неш-ВатIан» ибси дев мурталра бузахъули бири. Илгъуна цугбуцличил нушази ВатIа дурхъадешличила илдани балахъули бири. Гьайгьарагу, нешван ахIерси биэс гIягIяниси саби нушаб улкара. ВегI акIубси ва хIерируси мер-мусаличи диги агарси адам – шин агарси урунжгъуна сай.

Патриот бяркъ бедлугнилизи ВатIан дигахънила дурарад кадурхути сари: улкала тарих багьахъни, сегъуна къяндешличил ил кабизахъурсил, хала бегIтачибад букьурли баибси рухIла давла мяхIкамли бихIни, бегIтани дузахъути гIядатуни хъумхIертни ва илдала бетуц даимбарини, мез дузахъни. Илди далилтазибад цалабиркуси саби гьарил адамла рухIла кабиз.

 

ЧеалкIуси наслулис бархьси бяркъ бедни – нушала бегIлара халаси чебла саби. Лебтасалра ил шайчибси бузери цIакьбарес хIяжатбиркур.

П.Шахова