ГIяхIгъубзначила дахъал хабурти дакьибти сари нуни, амма вегIла миллатла, районна адамли гъабзадеш дакIударили гIяхIси баркьуди дураберкIниличила аргъалли, уркIи дебали разибирар ва пахрули бирцIур. Гьалабван Интернетлизи ца гIяхIгъабзачила хабар тIинтIбиуб. Иличила белчIунхIели, ил цIала тIякьгъуна дубурлайчила газетализира белкIес хьулрухъунра.
Гьарли-марси Игит МяхIяммад Зайпуллаев акIубси сай Сергокъалала районна Миглакьасимахьилизив. Ил живарили (мобилизоватьварили) СВО-лизи арукибсири. МяхIяммад Запорожьелизив къуллукъбирули калун, ургъаннизир диэс гIягIнити лерилра къиликъуни лерри илала.
МяхIяммадлис СВО-лизивад арадеш нукьсанбикили чарухъес чебуркъиб. Ил сунела хала бегIтала мер-мусаличи дебали дигичевси сай. МяхIяммад, Ставропольлизив нешличил хIерирули виалра, зумали Дагъистайзи, сунела биштIаси ВатIайзи вашар.
Гьалабван Ставропольлизибси ца юртлизи газлизирад цIадикибхIели, мякьлавад аркьуси МяхIяммад къалабаси кумек сабаайчи хIевъили, цIали абалкунси хъули ухIнавхъи, дяхъи-хъаслариубли, рашес хIерируси хьунул адам цIализирад дурасиб ва тухтуртачи раахъиб. Гьарил-декIар хIейрар, сунела гIямру пикрилра хIедарили, цархIил верцахъес багьандан цIализи ухIнавхъес.
Ил хабарла бакьили Сергокъалала районна ва лебил Дагъиста халкьли МяхIяммад Зайпуллаевличи пахрубирули саби. ГIяхIгъабзала гьунар бахълис гIибратли бетаур.
Илини бегI гьалар ахIен гъабзадеш баркьудилизир чедиахъути. Ил СВО-ла бутIакьянчи, хъуливхIелира акьули уули ахIен, сунечил бургъули калунтас ва цархIилтас кумек биахъули вашули сай. Илала дурабадра, чумал дус гьалар МяхIяммадлира, иличил бархтанира шаралар гIяндриркуси рурси рерцахъниличила бакьира.
Майла ахирличиб М.Гусаевла уличилси Дагъиста халкьла культурала центрлизиб, «Ставропольла крайла урусунала цалабяхъ» бикIуси жамигIятла организацияла руководитель В.В.Резниченкола тилади хIясибли, гьунибаъни бетерхур. Ил балкьаахъурсири Ставропольский крайла председатель А.М.ГIямаровли. Гьунибаъни ибхьули, илини МяхIяммад Зайпуллаевлис баркалла багьахъур, чули илала баркьудиличи пахрубирниличила аргъахъиб.
Балбуцличир бутIакьяндеш дариб: Ставропольский крайла миллатла политикала министрла къуллукъуни заманалис дируси, казачестволизив узуси В.А.Калхидовли; Дагъиста халкьла культурала центрла правлениела председательла заместитель А.Ш.Кичихановли; культурала центрла хIянчизартани, Россияла Игит НурмяхIяммад ХIяжимурадовла уличилси жагьилтала организацияли. Илдани МяхIяммадлис ва илис патриот бяркъ бедибти бегIтас халаси баркалла балахъулри.
Июньна 5-личив биалли, «Ставропольла крайла гьаларти къуллукъуни багьандан» медальличил гIяхIгъабза шабагъатлавариб.
Баркалла биаб МяхIяммадлис! ГIурра ЧевяхIсини гIевурцаб сай халкьлис гIяхIдешуни дирахъес.
Басират ХIяжимурадова
