Ишди бурхIназиб арагIеб республикализиб РФ-ла Бузерила Игит, республикала Пачалихъла Советла ХIурматла Председатель МяхIяммадгIяли МяхIяммадович МяхIяммадов акIубхIейчирад 95 дус дикнилис хасдарибти далдуцуни детерхур. Илди дурадеркIиб Дагъиста тах шагьарлизирра, ил акIубси ахIерси Лавашала шилизирра.
Дубурацад хIурматла вегI сай МяхIяммадгIяли МяхIяммадович дикIахIелра, сеналра хатIахIедиркехIе. СенахIенну илини халкь-ургаб халаси хIурмат сархибси саби сунела гъабзадешчерти баркьудлумачил ва пасихIкарси гIякьлуличил. Лебилра Дубуртар Улкала халкь уржахъес, ца халаси хъалибаргван хIеркабиахъес илиницад дахъал къайгъни дакIударибси гIур чилра хIергар или гьанбиркули саби наб.
ХIера, чумал бархIи гьалаб тах шагьарлизиб илала хIурматлис памятник абхьиб. Россияла ва Дагъиста политикала машгьурси хIяракатчи МяхIяммадгIяли МяхIяммадовлис багъишлабарибси памятник ибхьнилизир бутIакьяндеш дариб бахъал адамтани, ил лугIилизиб – Россиялизибад бакIибти хIурматла гIяхIланира. Балбуцла бутIакьянчибани ил бархIи МяхIяммадгIяли МяхIяммадовичличила шалати гьанбикуни гьаладихьиб, памятникличи вавни кадихьиб.
Памятник тIашбатурси саби Расул ХIямзатовла уличилси кьакьалаб. Ил бяхIчибизурли чебиур Дагъиста Правительствола Юртличи, сунезирра М.МяхIяммадовли гIяхIцад дусмазир дахъал хIянчи дарибси. Проектла авторли ветаур Россияла художествола академияла член-корреспондент, Дагъиста халкьла ва урибси художник МяхIяммад-ГIяли ГIялиев. Ил барес уста абзур дус узули калун. МяхIяммадгIяли МяхIяммадовла сипат жарма картIили барибси саби.
Ил бархIи МяхIячкъалализиб илкьяйдали М.МяхIяммадгIялиевличила лерилра гьанбикуни кадерхахъурли, балкьаахъурси «Дагъиста пахру» бикIуси жузличил адамти тянишбирнила балбуцра бетерхур. Ил белкIунси саби Мурад ГIяхIмадовли. Ил балбуцра Дагъистайс бекIдеш дирули калунси МяхIяммадгIяли МяхIяммадович гьаниркахънила мурадличил пачалихъла хIяракатчиби, жамигIятла вакилти ва журналистуни цабирахънила мягIничебси анцIбукьли бетаур.
Пачалихъла машгьурси хIяракатчи акIубси бархIи биалли, июньна 15-личир, Лавашала шилизир («Декъа» бикIуси мер-мусаличир) илала юбилейлис хасдарибти далдуцуни детерхур. Ил спортла гьарли-марси байрам сабри. Фестивальла программализи кадерхахъурлири спортла декIар-декIарти жураби: урчи дуцIдарни, дуцIбикIни, къаркъа иргьни, гьая зузбирни, някъби дирхIяхъни (армрестлинг), бухъяндешличи тIяхIбикIни. Илди абзанала бутIакьянчибили бетаур Дагъистайзибадти ва СКФО-ла республикализибадти спортсменти.
Спортла далдуцунала дурабад, гIяхIлас имканбакIиб Дагъиста миллатунала майдунтира чедаахъес. Буралли, ил гьарил балбуцла дебали дигеси бутIали бетаруси саби, сенахIенну илди майдунтазир нушала миллатунала культурала, гIядатунала жагадеш, хасдешуни хIисабдарес вирар. Илцадра давлачебси саби нушала Дагъиста халкьла культура. Иличи че, республикала пагьмула ва фольклорла коллективтани концертла халаси программара хIядурбарилри. Фестивальла бутIакьянчибани гьаладихьибти пагьмурти гIяхIлас дебали гIяхIдизнира чебаэслири.
Ил узидешла ва гьалмагъдешла бархбасуни уржахъуси балбуцлира бетаур. Абзаназир бутIакьяндеш дарнила дурабад, декIар-декIарти мер-мусаличибад бакIибти бутIакьянчибани саби-ургар юлдаш-тянишдеш акIахъуб. Илизиб саби дурадуркIути далдуцунала мягIничебдешра. ДирхехIе, гьаннала гIергъира илдани спортла далдуцуначир уржили бутIакьяндеш дирниличи. Дубуртазир дебш касибти гIяхIгъубзни сеналра цархIилтили биэсра хIебирар. Илдани гIяхIдеш бирнила, гIяхIлала хIурматбирнила пергер гIядатуни дузахъути сари, илдачи чула баркьибтира бурсибирути саби.
Буралли, республикала халкьлис илди чумал бархIи Дагъиста ва нушала улкала тарихлизир мурхьти къел калахъунти МяхIяммадгIяли МяхIяммадовла гIямрула гьуни сагадан чехIербарес, илала асилти баркьудлумас лайикьси кьимат бедес имканбакIиб. Илини Дагъистайзиб калахъунси паргъатдешла, халкь-ургабси уржибдешла хьулчначир сарра ишбархIира нуша хIердирути, дузути. Ил нушала гьарли-марси пахру сай.
Нушала корр.
