Июньна 18-личиб Дагъиста пачалихъла университетла ректор Рабаданов МуртазагIяли Хулаттаевичли пресс-конференция дураберкIиб, сунечибра белчIудила сагаси дуслизиб жагьилти вузанази кьабулбирнила шайчир дурадуркIути хIянчиличила багьахъурси.

Ишдуслизиб вузли багьудила верхцIанну урегра программа хIясибли абитуриентуни кьабулбирути саби: хIябцIанну урчIемра – бакалавриатла, верхIел – специалитетла, хIябцIали – магистратурала.  Буралли, бюджетла меранала кьадар азирлим даршлим шуцIанну гехIраличи абиркур.

ДГУ-ла ректорли багьахъурливан, абитуриентунани шел вузлизир детурхути конкурсуначир бутIакьяндеш дарес ва илдазибад гьариллизи шел бяхIчибизлизир документуни гьаладихьес бирар.

«Ишдуслизир нушани вузанази кабурхутас имканти гIяхIцадла дягIудирулра. Документуни гьаладихьес бирар вузлизи бакIили ва почтализирад дархьилицун ахIи, пачалихъла гIяхIдешунала (Госуслуги) порталлизирадра, илкьяйдали багьудила лерилра даражлумас хасбарибси жагьилти кьабулбирнила хIяракат кункбирахъуси сагаси кабизлизирадра», — цIакьбарили буриб МуртазагIяли Рабадановли.

Дагъиста пачалихъла университетла ректорли абитуриентуни вузанази кьабулбирнила тяхIяр-кьяйдаличилара чебетаахъили аргъахъиб.

Нушала корр.