Дубурла шимазиб хIербирути адамтала имцIатигъунти гIядатуни цагъунти дирар. Мекъ-сяхIбатла ва бебкIала гIядатуни цацадехIти шимазир циила декIардулхъулира дирар.
Ну акIубси ДугIахъарла шилизирра хала бегIтала цацадехIти гIядатуни дузахъес даимбиубли саби. БурахIелли, хъайчикабалтути жагьилтала бегIтани ва шанти-тухумтани ишхIелла манзиллизиб бузахъулицунра ахIи, гьалабяхI башахъуси ца гIядат леб. КIибехIелра тухумли халати чудни дирути сари, цабехIли итдилтас савгъатдарес багьандан. Илди илцадра халати дирар, уди мегь кабихьили ва чеди халаси журала силавча кабихьили, кьакьализир декла цIализир дуцIахъути сари. Гьаларти манзилтазиб ца илгъуна чуду хIядурбирусири цIикурила бегIтани. Уршила гъамтанира ца сабри бируси чуду. Гьанна биалли илдигъунти чудни 6-7 дуцIахъули сари. СенахIенну ил чуду дурала мерличибтасра бикахъес хIяжатли саби. Дураб хIербирути адамтира бахъал сабину. Ца чуду сеннира хIебиур. Ца чуду бирухIелира абзурли шанти бузутири. Гьаннара, гьайгьай, хIянчи имцIадиубли сари. Шагьуртазибтани илди чудни халати пекарнябазир дерцIахъесра имканти даргили сари.
Наб тамашабилзуси ца далил сабри. Ил чудули букахъес бегI гьалаб шила лебилра мурул адамти жибирутири. ГIур хьунул адамти бикутири. Илдани чула дурхIнас диштIа-диштIати кесекунира дарх кайсутири. Амма илцадра баракатла чуду сеннира абурхуси ахIенри.
Чудулис башнилис черикIла декьра тIалабдирути сари. 150-200 гидгари, нерхла 10 литрла бадира, ниъ ва чуду бизиси бетаахъес багьандан цархIилти секIултира. Амма нусира лебгIеб гIяхIси биэс хIяжатси саби. Илдигъунти чуднас хасли хIядурдирути сари гIявадеш калахъунти нусби.
Уршила нешли, гъамтани ва шантани чудуличи кадихьес бегIлара гIяхIти савгъатуни хIядурдирути сари ва илдира чудура духили, цIикурла бегIтачи аркьути саби. Уршила бегIтала чуду илаб кавлуси саби, цIикурила гIелабтани барибси биалли бакIибтас бедлугуси саби. Илкьяйдали дехIсурдирути сари илди чудни.
ЦацабехIтани бурули бирар селис хIяжатти илдигъунти харжанира къайгънира или. Амма дугIахъарлантас бегIлара дигуси ва жагаси гIядат саби ил. Гьайгьай, ил жагьилтани иштяхIличил даимбарниличи лебилра дугIахъарлантира разили саби.
ПатIимат Кьурбанова
