СВО-лизир гъабзадешла баркьудлуми дурадуркIули, ургъуси ГебекхIяжи МяхIяммадов сунечил бархтас гIибратли ветаурли сай. Илала дявила гьуни гьарли-марси игитдешла, ВатIайс мардешла ва узити бархбасунала тарихласи бетуцлизи халбарес вирар.
ГебекхIяжи ШихгIялиевич МяхIяммадов Дахадаевла районна Морское шилизивадси сай. ГIярмиялизиб къуллукъбарес укьяйчи илини бухгалтерла санигIят касес кьасбарибсири. Амма кьисматли ил санигIят бузахъес кьадархIебиахъуб. Илала хъалибарглизибадти лебилра мурул адамтани улкалис мардешличил къуллукъбарибсири. ГебекхIяжинира ургъанна санигIят чеббикIиб.
— ГIярмиялизиб къуллукъбарни хIурматла баркьуди саби, — викIули сай ГебекхIяжи. – Гьарил мурул адамли ил гIямрула школа бяркъес, вегIла хасиятуни ункъдиахъес ва ахIерси ВатIан, вегIла хъалибарг, гъамти мяхIкамбарес хIяжатси саби.
Уршили сунела хъалибаргла санигIят даимбарнилизи халбирули сай ВатIайс къуллукъличи кайзни.
Украинализир дявила анцIбукьуни дехIдихьибхIели Г.МяхIяммадов отделениела командир сайри. ХIярхIубала заблиур илини боеприпасуни дихутири, колоннаби ца мерличирадли — урехиагарси мерличи гечдирутири ва илди мяхIкамдарес багьандан къараулбирусири.
— Гьала-гьала, гьайгьайрагу, гьамадли ахIенри, — викIули сай ил. – Амма нуни ункъли балулри ил хIянчи нушани ахIи, цархIилтани хIебирни. Нушазибадли дигахъусири бургъанти хIяжатти секIайчил: патирантачил, дармунтачил, цIабикьайчил,… гIеббурцни.
Г.МяхIяммадовла чекайзниличивли колоннаби бетахъриби агарли, хIяжатти мераначи диахъутири ва дявила анцIбукьуни детурхути гьаларти къяянази гьарил секIал заманаличир дихутири.
Илкьяйдали къуллукъбирни багьандан, старшина Г.МяхIяммадов Жуковла медальличил шабагъатлаварибсири.
Гьачам Г.МяхIяммадовли ца балагардешличи пикри бяхIчиаиб. ГIядатла палтарличил вегIиубси адамли машинабала суратуни кайсулри, ва лайикьагарти суалтачил ил бургъантачи дугьавилзулри. Илала баркьудиличи ташмишухъунси Г.МяхIяммадовли итмаданал ил уциб, телефон кебасиб ва хIяжатси мерличи ваахъиб. Г.МяхIяммадовла чеветаибдешличил баянбиубсири хIилла дурахIеберкIахъес бажардиикиб. Амма иличиблира анцIбукь таманбиубси ахIенри. КIинайсра старшинали ташмишухъесил адам уцибсири. Ил паргъатагариублири ва гIур ахтардиварибхIели илала техникаличила баянтачилси блокнот баргибсири. БелкIани хIясибдарибхIели, ил душмайс кумекбируси верша виъни якьинбиубсири.
2022 ибил дусла мартличиб цагьатIи хъумхIертесил анцIбукь кабикибсири Г.МяхIяммадовли къуллукъбируси мерличиб. Колонналичи душмай цIа чекьурлири. Автомобильный батальонна комбат вяхъилри. Амма тыллизибтани заманаличиб кумек гIеббаахъниличибли, душман гIелавяхI гьавяхъибсири.
— Лебтанилра уржили къаршидеш дирулри. Нушачи хабарагарли чевхъес дигуси душма селра бетхIеур, — гьанбиркахъули сай старшинани.
Къуллукъбируси манзиллизив ГебекхIяжи ШихгIялиевич II-ибил даражала «Дявила асилдеш багьандан» ва «Дявилизив декIарухъни багьандан» ибти медальтачил шабагъатлаварибси сай. Амма сунени бурни хIясибли, бекIлибиубсигъуна шабагъат – бархкьябани хIурматбирни ва чедибдеш сархес багьандан умутличил гьарил секIал дирни саби.
Дахадаевла районна администрацияла пресс-служба
