Дагъистайзиб физикала ва математикала гIилму гьалабяхI башниличил бархьаначи вархвасунси пагьмучевси гIялим Ахъай Кьурбанович Муртазаев Россияла гIилмуртала академияла гьарли-марси академикла чебяхIси уличи лайикьикни арагIебли Дагъиста гIилмулис дебали мягIничебси анцIбукьли бетаур.
Республикала гIилмула гIямрулизиб кабикибси ил разиси анцIбукьли лебил дунъяла даражаличир мардарибти гIялимла сархибдешунас бикьридеш дирули саби. Ахъай Кьурбанович Муртазаев – ДФИЦ РАН-ла директор, физикала-математикала гIилмуртала доктор, профессор сай. Илини 1999 ибил дуслизиб Санкт-Петербургла Пачалихъла университетлизиб гIилмуртала докторла гIилмула хIянчи бетерхахъурсири. Дахъал дусмазиб А.Кь.Муртазаевли РАН-ла тарихлизиб бегIла гьалаб сунени акIахъубси гIилмула лабораториялис гьуни чебиахъули сай. Лабораторияли физикала гIилмулизиб бузути гIяхIцад жагьилти гIялимтас сархибдешуначи баахъес дахъал имканти гьаргдариб.
Дагъистан Республикала БекI Сергей Меликовлира гIялим Дагъиста гIилмула тарихлизиб биубси бекIлибиубси анцIбукьличил мубараквариб. Дагъиста БекIли сунела телеграм-каналлизиб Ахъай Муртазаев Россияла машгьурси гIялим виъниличила бурули, 800-личирра имцIали гIилмула хIянчи делкIунси, илди дунъяла даражаличир тасдикьдарибси халаси гIялим ва академик виъни марбариб.
Республикала БекIли челябкьлализибра пагьмучебти гIялимти гIеббуцес ва илдала хIялумцIлаби дурадуркIнила, илди гьаладяхI дашахънила шайчибси бузерилис лайикьти шуртIри алкIахънила хIекьлизиб кумекбарес чесиб.
«Замана» газетала агьлула шайзивадра дунъяла гIилмула ахъанайтачи ваибси Ахъай Кьурбанович Муртазаев академикла чебяхIси у сархниличил уркIи-уркIилавад мубараквирулра. Дагъистанлантани, даргантани республикала гIилму гьалабяхI башахъуси гIялимличи пахрубирули саби. Ахъай Кьурбановичлис гIилмула ахъанайтачир гьатIира черяхIти сархибдешуни, гьарбизуни, чIумаси арадеш ва талихI дулгулра.
Илини ахъибси гIилмула гьуни бахъал гIялимтас гIибратли ва Дагъиста гIилму гьатIира гьалабяхI башахънилис хьулчили бетарнила шайчир ташмишдеш алкIули ахIен! ГIилмулизи кайцIуси гьарил ганзлизир даршдусмазир калести гьарбизуни диаб!
